తమిళ అగ్ర కథానాయకుడు దళపతి విజయ్ రాజకీయాల్లోకి రాబోతున్న విషయం తెలిసిందే. ఇటీవలే ఆయన ‘తమిళ వెట్రి కజగం’ పేరుతో పార్టీ ఏర్పాటు చేస్తున్నట్లు ప్రకటించారు. 2026లో తమిళనాడు అసెంబ్లీకి జరిగే ఎన్నికలే లక్ష్యంగా తమ పార్టీ కార్యాచరణ ఉంటుందని ఆయన తెలిపారు. క్రియాశీలక రాజకీయాలపై పూర్తి స్థాయిలో దృష్టి పెట్టే యోచనలో ఉన్న విజయ్ తన 69వ సినిమా పూర్తిచేసిన అనంతరం సినీ రంగానికి గుడ్బై చెప్పనున్నట్లు పార్టీ ప్రకటన రోజునే వెల్లడించారు. ప్రస్తుతం విజయ్ ‘గోట్’ (గ్రేటెస్ట్ ఆఫ్ ఆల్టైమ్) చిత్రంలో నటిస్తున్నారు.
ఆయనకు ఇది 68వ చిత్రం. వెంకట్ప్రభు దర్శకుడు. ప్రస్తుతం చిత్రీకరణ జరుగుతున్నది. ఈ సినిమా పూర్తయిన వెంటనే 69వ సినిమా పట్టాలెక్కనుంది. ఈ సినిమా కోసం పలువురి దర్శకుల పేర్లు తెరపైకొస్తున్నాయి. తాజా సమాచారం ప్రకారం వెట్రిమారన్ ఈ చిత్రాన్ని డెరెక్ట్ చేయబోతున్నారని తెలిసింది. సామాజిక సమస్యల్ని తనదైన పంథాలో వెండితెరపై ఆవిష్కరించే వెట్రిమారన్.. విజయ్ పొలిటికల్ ఎంట్రీని దృష్టిలో పెట్టుకొని కథను సిద్ధం చేస్తున్నారని తెలిసింది. ఈ చిత్రాన్ని తెలుగు అగ్ర నిర్మాత డీవీవీ దానయ్య తెరకెక్కించబోతున్నారని సమాచారం.