Rag Mayur | జాతీయ వేదికపై మెరిసిన తెలుగు నటుడు రాగ్ మయూర్.. ‘సివరపల్లి’ సిరీస్‌కు గానూ ఉత్తమ నటుడిగా అవార్డు!

Rag Mayur | ఎలాంటి హంగు ఆర్భాటాలు లేకుండా, మట్టి వాసన వెదజల్లే సహజసిద్ధమైన పాత్రలతో మెప్పిస్తున్న మన తెలుగు నటులు నేడు జాతీయ స్థాయిలో సంచలనాలు సృష్టిస్తున్నారు.

Sivarapalli | ఎలాంటి హంగు ఆర్భాటాలు లేకుండా, మట్టి వాసన వెదజల్లే సహజసిద్ధమైన పాత్రలతో మెప్పిస్తున్న మన తెలుగు నటులు నేడు జాతీయ స్థాయిలో సంచలనాలు సృష్టిస్తున్నారు. తనదైన అద్భుత నటనతో ప్రేక్షకులను అలరిస్తున్న యువ నటుడు రాగ్ మయూర్‌ ముంబై వేదికగా జరిగిన ప్రతిష్టాత్మక ‘నెక్సా స్ట్రీమింగ్ అకాడమీ అవార్డ్స్’ (NEXA Streaming Academy Awards) వేడుకలో ఉత్తమ నటుడిగా (బెస్ట్ యాక్టర్) అవార్డును సొంతం చేసుకున్నారు.

అమెజాన్ ఒరిజినల్ సిరీస్ అయిన ‘సివరపల్లి’లో ఆయన పోషించిన అద్భుతమైన పాత్రకు గానూ ఈ జాతీయ స్థాయి గుర్తింపు లభించింది. దేశవ్యాప్తంగా సినీరంగంలో ఉన్న ప్రముఖులు హాజరైన ఈ వేడుకలో రాగ్ మయూర్ ప్రత్యేక ఆకర్షణగా నిలిచారు. బాలీవుడ్ దిగ్గజ నటులు మనోజ్ బాజ్‌పేయి, బోమన్ ఇరానీ వంటి ఉద్ధండులతో పాటు, ప్రఖ్యాత దర్శక ద్వయం రాజ్ & డీకే వంటి ప్రముఖులతో కలిసి ఆయన ఒకే వేదికను పంచుకోవడం విశేషం. తెలుగు ప్రాంతీయ కథలు, ఇక్కడి పాత్రలు నేడు జాతీయ స్థాయిలో ఏ విధంగా ఆదరణ పొందుతున్నాయో చెప్పడానికి ఈ ఘనతే నిదర్శనంగా నిలిచింది. కంటెంట్ బలంగా ఉంటే, అది ప్రజలకు చేరే విధానంలో భాషా బేధాలు అస్సలు అడ్డురావని, కేవలం నటుడి హావభావాలు, పాత్రలో జీవించే తత్వమే ఉన్నత స్థానంలో నిలబెడతాయని రాగ్ మయూర్ విజయంతో మరోసారి నిరూపితమైంది. ప్రాంతీయ పరిధులను దాటి, తన అంకితభావంతో అద్భుతమైన ప్రతిభను కనబరిచిన రాగ్ మయూర్ విజయం… రాబోయే తరానికి చెందిన ఎంతో మంది యువ నటులకు ఒక గొప్ప స్ఫూర్తిగా నిలుస్తుందనడంలో ఎలాంటి సందేహం లేదు.