Vikrant Rona Movie | ఓటీటీలోకి ‘విక్రాంత్ రోన’ తెలుగు వెర్ష‌న్‌.. స్ట్రీమింగ్ ఎప్పుడంటే?

Vikrant Rona Movie On OTT | ‘విక్రాంత్‌ రోన’ సినిమాతో జాతీయ స్థాయిలో గుర్తింపు తెచ్చుకున్నాడు కిచ్చా సుదీప్. అనూప్ భండారి ద‌ర్శ‌క‌త్వం వ‌హించిన ఈ చిత్రం జూలై 28న విడుద‌లై ఘ‌న విజ‌యం సాధించింది. సుదీప్ కెరీర్‌లోనే హైయెస్ట్ క‌లెక్ష‌న్లు సాధించిన సినిమాగా ఈ చిత్రం నిలిచింది. అంతేకాకుండా విడుద‌లైన ప్ర‌తి భాషలో భారీ వ‌సూళ్ళ‌ను సాధించి డ‌బుల్ బ్లాక్ బాస్ట‌ర్‌గా నిలిచింది. ఫ‌స్ట్ వీకెండ్‌లోనే బ్రేక్ ఈవెన్‌ను పూర్తి చేసుకుని ‘కేజీఎఫ్’ త‌ర్వాత ఆ స్థాయిలో ఇండియాని షేక్ చేసిన క‌న్న‌డ‌ సినిమాగా ‘విక్రాంత్ రోన’ నిలిచింది. దాదాపు రూ.95కోట్ల బ‌డ్జెట్‌తో తెర‌కెక్కిన ఈ చిత్రం ఫైన‌ల్‌గా రూ.250 కోట్ల‌కు పైగా కలెక్ష‌న్ల‌ను సాధించింది. ఇక ఇటీవ‌లే ఈ చిత్రం క‌న్న‌డ వెర్ష‌న్ ఓటీటీలో విడుద‌లవ‌గా.. మంచి వ్యూవ‌ర్‌షిప్‌తో దూసుకుపోతుంది.

కాగా తెలుగు వెర్ష‌న్ కోసం టాలీవుడ్ ప్రేక్ష‌కులు ఎంత‌గానో ఎదురు చూస్తున్నారు. తాజాగా తెలుగు వెర్ష‌న్‌కు సంబంధించిన ఓ వార్త నెట్టింట వైర‌ల్‌గా మారింది. ఈ మూవీ తెలుగు వెర్ష‌న్‌ సెప్టెంబ‌ర్ 16 నుండి డిస్నీ+హాట్‌స్టార్‌లో స్ట్రీమింగ్ కానున్న‌ట్లు తెలుస్తుంది. త్వ‌ర‌లోనే దీనిపై అధికారికంగా ప్ర‌క‌ట‌న రానుంది. ఈ చిత్రాన్ని షాలినీ ఆర్ట్స్‌, ఇన్వెనియో ఒరిజిన్ సంస్థ‌ల‌తో క‌లిసి సుదీప్ స్వీయ నిర్మాణంలో తెర‌కెక్కించాడు. ఈ చిత్రంలో నిరూప్ భండారి, నీతా అశోక్ కీల‌క‌పాత్రల్లో న‌టించారు. బాలీవుడ్ బ్యూటీ జాక్వెలిన్ ఫెర్నాండెజ్ ప్ర‌త్యేక గీతంలో అలరించింది.