శ్రీకాంత్ రెడ్డి, సంచిత బసు జంటగా నటిస్తున్న సినిమా ‘ఫస్ట్ డే ఫస్ట్ షో’. ఈ చిత్రాన్ని మిత్రవిందా మూవీస్, శ్రీజ ఎంటర్టైన్మెంట్స్ పతాకాలపై శ్రీజ నిర్మిస్తున్నారు. కథ స్క్రీన్ప్లే మాటలు ‘జాతిరత్నాలు’ దర్శకుడు కేవీ ఆనంద్ అందిస్తున్నారు. వంశీధర గౌడ్, పి.లక్ష్మీనారాయణ దర్శకులు.
చిత్రీకరణ పూర్తి చేసుకున్న ఈ సినిమా సెప్టెంబర్ 2న విడుదలకానున్నది. బుధవారం జరిపిన పాత్రికేయ సమావేశంలో దర్శకులు వంశీధర గౌడ్, పి.లక్ష్మీనారాయణ చిత్ర విశేషాలు తెలిపారు. వారు మాట్లాడుతూ…‘తెలుగు సినీ పరిశ్రమలో ఆణిముత్యాల్లాంటి చిత్రాలను నిర్మించిన పూర్ణోదయ అనుబంధ సంస్థలో దర్శకులుగా పరిచయం అవడం అదృష్టంగా భావిస్తున్నాం. ఓ మంచి కథను తెరకెక్కించాలనే ఆలోచనే మమ్మల్ని ముందుకు నడిపించింది.
ఇద్దరం దర్శకులమైనా సమన్వయంతో పనిచేశాం. సన్నివేశాల చిత్రీకరణ, కథలోని భావోద్వేగాలను ఎలా చూపించాలని కలిసే ఆలోచించాం. 2000 సంవత్సర నేపథ్యంతో ఈ సినిమా సాగుతుంది. ఈ చిత్రంలో హీరో పేరు శ్రీను. అతను పవన్ కళ్యాణ్ అభిమాని. కాలేజీలో ఒక అమ్మాయిని ఇష్టపడతాడు.
ఆ అమ్మాయి ‘ఖుషి’ సినిమా తొలి రోజు తొలి ఆట టికెట్స్ కావాలని శ్రీనును అడుగుతుంది. ఆ టికెట్స్ సంపాదించేందుకు అతను ఎలాంటి ప్రయత్నాలు, సాహసాలు చేశాడు అనేది సినిమాలో ఆసక్తికరంగా చూపించాం. కథలో ఆశ్చర్యపరిచే అంశాలుంటాయి. 20 ఏళ్ల కిందటి వాతావరణాన్ని సినిమాలో అందంగా రీ క్రియేట్ చేశాం.’ అన్నారు.