Sita Ramam | ‘నా దేశం ప‌రువు మీతో పంప‌లేను కదా మేడం’.. ‘సీతారామం’ డిలీటెడ్ సీన్ రిలీజ్‌

Sita Ramam Movie Deleted Scene | ఈ ఏడాది బ్లాక్‌బాస్ట‌ర్ చిత్రాల‌లో ‘సీతారామం’ ఒక‌టి. దుల్క‌ర్ స‌ల్మాన్ హీరోగా న‌టించిన ఈ చిత్రం ఆగ‌స్టు 5న విడుద‌లై ఘ‌న విజ‌యం సాధించింది. హ‌ను రాఘ‌వ‌పూడి ద‌ర్శ‌క‌త్వంలో తెర‌కెక్కిన ఈ చిత్రం ఇటీవ‌లే హిందీలో విడుద‌లై అక్క‌డ కూడా మంచి విజ‌యం సాధించింది. బాలీవుడ్‌లో రోజు రోజుకు ఈ సినిమాపై ఆధ‌ర‌ణ పెరుగుతూనే ఉంది. తెలుగులో ఈ సినిమాకు దాదాపు రూ.30 కోట్ల వ‌ర‌కు ప్రాఫిట్స్ వ‌చ్చాయి. ఇలాంటి ఒక పీరియాడిక‌ల్ ఫీల్ గుడ్ మూవీకి, పైగా మ‌ల‌యాళ హీరోకు ఈ రేంజ్‌లో కలెక్ష‌న్లు వ‌చ్చాయంటే విశేషం అనే చెప్పాలి. ఈ చిత్రంతో దుల్క‌ర్‌కు తెలుగులో మంచి మార్కెట్ ఏర్ప‌డింది. సినిమా విడుద‌లై నెల రోజులైన ఇంకా థియేట‌ర్‌లలో ప్ర‌ద‌ర్శిత‌మ‌వుతూనే ఉంది. ఇదిలా ఉంటే తాజాగా మేక‌ర్స్ ఈ సినిమా డిలీటెడ్ సీన్‌ను విడుద‌ల చేశారు.

సీతా మ‌హాల‌క్ష్మీ కోసం ర‌ష్మిక‌ వెతుక్కుంటూ వెళ్లే క్ర‌మంలో ఓ ప్యాలెస్ ద‌గ్గ‌రికి క్యాబ్‌లో వెళ్తుంది. అయితే త‌న బ్యాగ్‌ను క్యాబ్‌లోనే మ‌ర‌చిపోయి లోప‌లికి వెళ్తుంది. బ్యాగ్ కోసం వెన‌క్కి వ‌చ్చి డ్రైవ‌ర్‌ని ‘ఇంకా ఇక్క‌డే ఉన్నావా.. ప‌ర్లేదు, ఇండియాలో కూడా నీలాంటి వాళ్ళున్నార‌న్న మాట‌’ అని అంటుంది. దానికి క్యాబ్ డ్రైవ‌ర్ ‘ఇండియాలో అంద‌రూ నాలానే ఉంటారు. మీ బ్యాగ్ తీసుక‌పోయి నా దేశం ప‌రువు మీతో పంప‌లేను కదా మేడం’ అంటూ చెప్పిన డైలాగ్ ఆక‌ట్టుకుంటుంది. దీనిపై ప‌లువురు నెటీజ‌న్లు ఇంత మంచి సీన్‌ను ఎందుకు ఎడిట్ చేశారు అంటూ కామెంట్స్ చేస్తున్నారు.

పీరియాడిక్ ల‌వ్‌స్టోరీగా తెర‌కెక్కిన ఈ చిత్రంలో దుల్క‌ర్ లెఫ్టినెంట్ రామ్ పాత్ర‌లో న‌టించాడు. దుల్క‌ర్‌కు జోడీగా మృనాళ్ థాకూర్ హీరోయిన్‌గా న‌టించింది. ర‌ష్మిక మంద‌న్న కాశ్మీర్ ముస్లిం అమ్మాయిగా కథ‌ను మ‌లుపు తిప్పే పాత్ర‌లో న‌టించింది. సుమంత్‌, త‌రుణ్‌భాస్క‌ర్ కీల‌క‌పాత్ర‌ల్లో న‌టించిన ఈ చిత్రాన్ని స్వ‌ప్న సినిమాస్ బ్యాన‌ర్‌పై స్వ‌ప్న ద‌త్ నిర్మించింది.