కిస్మస్‌, సాయిపల్లవి..ఈ కాంబినేషన్‌ నానికి ఎందుకు సెంటిమెంట్‌?

By Maduri Mattaiah

ఈ క్రిస్మస్‌తో పాటు కథానాయిక సాయిపల్లవి కూడా నాకు సెంటిమెంట్‌ అంటున్నారు కథానాయకుడు నాని. ఆయన నటించిన తాజా చిత్రం ‘శ్యామ్‌ సింగరాయ్‌’ రాహుల్‌ సంకృత్యన్‌ దర్శకత్వం వహించిన ఈ చిత్రం డిసెంబరు 24న విడుదల కానుంది. ఈ సినిమా టీజర్‌ విడుదల గురువారం హైదరాబాద్‌లో జరిగింది.

ఈ సందర్భంగా నాని మాట్లాడుతూ ‘కిస్మస్‌ నాకు చాలా స్పెషల్‌.. ఆ సీజన్‌లో ఎంసీఏతో పెద్ద విజయం సాధించాను.. అంతేకాదు ‘ఎంసీఏ’లో నటించిన సాయిపల్లవి కూడా ఈ చిత్రంలో హీరోయిన్‌ కావడం, ‘ఎంసీఏ’తో హిట్‌ అందుకున్న మా కాంబినేషన్‌లోనే ‘శ్యామ్‌ సింగరాయ్‌’ రావడంతో సెంటిమెంట్‌ పునరావృతం అవుతుందని అనుకుంటున్నాను. హిట్‌పెయిర్‌గా మా కాంబినేషన్‌లో మరిన్ని సినిమాలు చేయాలనుకుంటున్నాను.‘శ్యామ్‌సింగరాయ్‌’ ఇదొక భిన్నమైన ప్రేమకథ. ఈ కథలో హీరో అమ్మ తెలుగు మహిళ, నాన్న బెంగాలీ..ఈ కథ విన్నప్పుడే కొత్తదనం కనిపించింది.

ఈ చిత్రంలో కొత్త నానిని చూస్తారు, నా ఆహార్యంతో పాటు అన్ని కొత్త గా వుంటాయి. కథగా విన్న దానికంటే సినిమా చాలా బాగా వచ్చింది..సినిమాలో వున్న ట్విస్ట్‌లు ఎక్కువగా అర్థం కాకూడదనే టీజర్‌ను జాగ్రత్తగా కట్‌ చేశాం. టీజర్‌ కంటే సినిమా వందరెట్లు బాగుంటుంది. మీ అందరితో పాటు థియేటర్‌లో సినిమా చూడాలని ఎదురుచూస్తున్నాను.అందరి అంచనాల్ని సంతృప్తిపరిచేలా సినిమా ఉంటుంది’ అని తెలిపారు.

ఆకట్టుకునే సంభాషణలతో టీజర్‌: ‘అడిగే అండ లేదు..కలబడే కండ లేదని రక్షించాల్సిన దేవుడే రాక్షసుడిగా మారుతుంటే..కాగితం కడుపు చీల్చుకుపుట్టి రాయడమే కాదు..కాలరాయడం కూడా తెలుసని అక్షరం పట్టుకున్న ఆయుధం పేరే శ్యామ్‌సింగరాయ్‌’ అనే శక్తివంతమైన సంభాషణలతో టీజర్‌ ఆకట్టుకుంటుంది.