ఆ ప్రశ్న అడగొద్దు!

ఇటీవల సోషల్‌మీడియాలో అభిమానులతో ముచ్చటించింది తమిళ చిన్నది శృతిహాసన్‌. వారు అడిగిన ప్రశ్నలకు తనదైన శైలిలో సమాధానమిచ్చింది. అయితే ఓ అభిమాని పెళ్లెప్పుడని అడగ్గా.. ప్రపంచమంతా కరోనా మహమ్మారి నుంచి విముక్తులు కావాలని శ్రమిస్తుంటే నా పెళ్లి వార్త కావాల్సి వచ్చిందా అంటూ చురకలంటించింది. ఈ సంక్షోభ సమయంలో దృష్టిపెట్టాల్సిన అంశాలు చాలా ఉన్నాయని, ప్రస్తుతం పెళ్లి గురించి ఎలాంటి ఆలోచన లేదని తేల్చిచెప్పింది. అసలు అలాంటి ప్రశ్నలు అడగొద్దని హెచ్చరించింది. ‘ఇప్పుడు మనముందు పరిష్కరించుకోవాల్సిన సమస్యలు చాలా ఉన్నాయి. ముఖ్యంగా కరోనా బారి నుంచి ప్రపంచమంతా బయటపడి సుఖసంతోషాలు వెల్లివిరియాలి. ఆ తర్వాతే మిగతా విషయాల గురించి ఆలోచిద్దాం’ అని శృతిహాసన్‌ చెప్పింది. ఇదిలావుండగా ప్రముఖ ఆర్టిస్టు శంతను హజారికాతో శృతిహాసన్‌ గత కొంతకాలంగా సన్నిహితంగా ఉంటోంది. వీరిద్దరి మధ్య స్నేహానికి మించిన అనుబంధం ఏదో ఉందని గుసగుసలు వినిపిస్తున్నాయి. ప్రస్తుతం శృతిహాసన్‌ తెలుగులో ‘సలార్‌’ చిత్రంలో నటిస్తోంది.