కొత్త ప్రయాణం ఆరంభం

‘దొరసాని’ చిత్రంలో సహజ నటనతో తెలుగు ప్రేక్షకుల్ని మెప్పించింది రాజశేఖర్‌ తనయ శివాత్మిక. తొలి సినిమా ఫలితాన్ని దృష్టిలో పెట్టుకొని కథల ఎంపికలో జాగ్రత్తగా అడుగులు వేస్తోన్న ఆమె తెలుగుతో పాటు తమిళ చిత్రసీమపై దృష్టిపెడుతోంది. గౌతమ్‌కార్తిక్‌ హీరోగా నటిస్తున్న ‘ఆనందం విలయాడుమ్‌ వీడు’ సినిమా ద్వారా ఈ ఏడాది కోలీవుడ్‌లో అరంగేట్రం చేయబోతున్నది శివాత్మిక. మొదటి సినిమా విడుదలకాకముందే తమిళంలో మరో చిత్రాన్ని అంగీకరించింది. అశోక్‌ సెల్వన్‌ హీరోగా ఆర్‌ కార్తిక్‌ దర్శకత్వంలో రూపొందుతున్న ప్రేమకథా చిత్రంలో శివాత్మిక కథానాయికగా నటించనున్నది. ఆమెతో పాటు రీతూవర్మ, అపర్ణబాలమురళి ఈ సినిమాలో హీరోయిన్లుగా కనిపించబోతున్నారు. రోడ్‌జర్నీ నేపథ్యంలో తెరకెక్కనున్న ఈ సినిమాలో విలక్షణమైన పాత్రలో శివాత్మిక కనిపించనున్నట్లు వార్తలొస్తున్నాయి. ‘నా కెరీర్‌లో ప్రత్యేకంగా నిలిచిపోయే చిత్రమిది. ప్రతిభావంతులైన టీమ్‌తో కలిసి పనిచేసే సమయం కోసం ఉత్సుకతగా ఎదురుచూస్తున్నా’ అని శివాత్మిక ట్విట్టర్‌ ద్వారా పేర్కొన్నది. ఈ సినిమాలో ఇద్దరు తెలుగు హీరోయిన్లు నటించనుండటం గమనార్హం.