ఒకటే కదా జీవితం..

శర్వానంద్‌ కథానాయకుడిగా నటిస్తున్న తాజా చిత్రం ‘ఒకే ఒక జీవితం’. శ్రీకార్తీక్‌ దర్శకుడు. డ్రీమ్‌ వారియర్‌ పిక్చర్స్‌ పతాకంపై ఎస్‌.ఆర్‌.ప్రకాష్‌బాబు, ఎస్‌.ఆర్‌.ప్రభు నిర్మిస్తున్నారు. శర్వానంద్‌ నటిస్తున్న 30వ చిత్రమిది. సెప్టెంబర్‌ 9న ప్రేక్షకుల ముందుకురానుంది. ఈ సినిమాలోని ‘ఒకటే కదా..’అనే పాట లిరికల్‌ వీడియోను మంగళవారం విడుదల చేశారు. కథానాయకుడి జీవితంలోని సంఘర్షణ, ప్రేమకోసం అతను పడే తపనను ఆవిష్కరిస్తూ ఈ పాట సాగింది. కృష్ణకాంత్‌ సాహిత్యాన్ని అందించిన ఈ పాటకు జేక్స్‌ బిజోయ్‌ స్వరాల్ని సమకూర్చారు. గౌతమ్‌ భరద్వాజ్‌ ఆలపించారు. ‘ఫీల్‌గుడ్‌ రొమాంటిక్‌ ఎంటర్‌టైనర్‌ ఇది. ఇటీవల విడుదలైన టీజర్‌కు అద్భుతమైన స్పందన లభిస్తున్నది’ అని చిత్రబృందం పేర్కొంది. రీతూవర్మ, అమల అక్కినేని, వెన్నెల కిషోర్‌, ప్రియదర్శి, నాజర్‌ తదితరులు నటిస్తున్న ఈ చిత్రానికి కెమెరా: సుజిత్‌ సారంగ్‌, సంభాషణలు: తరుణ్‌భాస్కర్‌, రచన-దర్శకత్వం: శ్రీకార్తీక్‌.