Visit:
Happy Journey Teaser | విభిన్న వయసులు, భిన్న మనస్తత్వాలు కలిగిన ఏడుగురు మహిళలు కలిసి ప్యారిస్ వెకేషన్కు వెళ్తే ఎలాంటి క్రేజీ అనుభవాలు ఎదురయ్యాయి అనే ఆసక్తికరమైన కథాంశంతో టాలీవుడ్లో సరికొత్త చిత్రం తెరకెక్కుతోంది. అభిరామ్ నాయుడు దర్శకుడిగా పరిచయమవుతున్న ఈ ‘హ్యాపీ జర్నీ’ చిత్ర అధికారిక టీజర్ తాజాగా విడుదలై సోషల్ మీడియాలో మంచి రెస్పాన్స్ తెచ్చుకుంటోంది. సాధారణంగా వచ్చే కమర్షియల్, పురుష ప్రధాన సినిమాలకు భిన్నంగా, పూర్తిగా మహిళల ఎమోషనల్ బాండింగ్ మరియు రోడ్-ట్రిప్ చుట్టూ తిరిగే హార్ట్-వార్మింగ్ డ్రామాగా ఈ సినిమా రూపొందింది. తమ జీవితాల్లోని బాధలు, ఒత్తిడిని మర్చిపోవడానికి ప్యారిస్ ప్రయాణమైన ఏడుగురు మహిళల జీవితాలు అక్కడ ఎలాంటి మలుపు తిరిగాయనేది ఈ చిత్రంలో చూపించబోతున్నారు.
ఈ సినిమాలో సీనియర్ నటీమణులు అన్నపూర్ణమ్మ, ఆమనిలతో పాటు యాంకర్ ఝాన్సీ, పాయల్ రాధాకృష్ణ, జినిషా అలీశెట్టి, రూపా శ్రీనివాస్, సునయన ప్రధాన పాత్రల్లో నటిస్తున్నారు. ప్యారిస్ బ్యాక్డ్రాప్లో అన్నపూర్ణమ్మ, ఆమనిల సందడి ఈ టీజర్లో ప్రత్యేక ఆకర్షణగా నిలిచింది. అలాగే వంశీధర్ గౌడ్, పృధ్వీ దండమూడి, రవి శివతేజ పైలా కీలక పాత్రల్లో కనిపించనున్నారు. ఈ సినిమాను గుట్ట ప్రొడక్షన్స్ మరియు కమలాకర్ ఫిల్మ్ కార్పొరేషన్ పతాకాలపై బాలాజీ గుట్ట, కౌశిక్ రెడ్డి నిర్మిస్తుండగా, తరుణ్ రెడ్డి సహ నిర్మాతగా వ్యవహరిస్తున్నారు. శేఖర్ చంద్ర సంగీతం అందిస్తున్న ఈ చిత్రానికి మణికందన్ సుబ్రమణియన్ సినిమాటోగ్రఫీ, ఛోటా కె. ప్రసాద్ ఎడిటింగ్ బాధ్యతలు చేపట్టారు. ప్యారిస్, మాంట్పెలియర్ లాంటి అందమైన యూరోపియన్ లొకేషన్లలో రిఫ్రెషింగ్ విజువల్స్తో రూపొందిన ఈ చిత్రం త్వరలోనే థియేటర్లలో సందడి చేయనుంది.
