Singapore Saloon | నవ్వుల డ్రామా సింగపూర్‌ సెలూన్‌

నయనతార ప్రధాన పాత్రలో వచ్చిన ‘అమ్మోరు తల్లి’ సినిమాతో ఆర్జే బాలాజీ తెలుగులో ఓటీటీ ప్రేక్షకులకు దగ్గరయ్యాడు. ఆ చిత్రంలో అతని కామెడీ టైమింగ్‌కు చాలామంది అభిమానులు అయ్యారు.

సింగపూర్‌ సెలూన్‌ (తమిళం)
అమెజాన్‌ ప్రైమ్‌: ఫిబ్రవరి 23
నటీనటులు: ఆర్జే బాలాజీ, సత్యరాజ్‌, లాల్‌, మీనాక్షి చౌదరి
దర్శకత్వం: గోకుల్‌

Singapore Saloon | నయనతార ప్రధాన పాత్రలో వచ్చిన ‘అమ్మోరు తల్లి’ సినిమాతో ఆర్జే బాలాజీ తెలుగులో ఓటీటీ ప్రేక్షకులకు దగ్గరయ్యాడు. ఆ చిత్రంలో అతని కామెడీ టైమింగ్‌కు చాలామంది అభిమానులు అయ్యారు. తాజాగా బాలాజీ నటించిన ‘సింగపూర్‌ సెలూన్‌’ చిత్రం తమిళ వెర్షన్‌ను కూడా తెలుగు ప్రేక్షకులు చూస్తున్నారంటే.. ఓటీటీలో అతనికి ఉన్న క్రేజ్‌ ఏంటో అర్థం చేసుకోవచ్చు. కథలోకి వెళ్తే.. కదిర్‌ (ఆర్జే బాలాజీ) తెన్‌కాశీలో ఉంటుంటాడు. చిన్నప్పటి నుంచి ‘సింగపూర్‌ సెలూన్‌’ నిర్వాహకుడు చాచా (లాల్‌) అంటే అతనికి ప్రాణం. ఆయన స్ఫూర్తితోనే పెద్దయ్యాక మంచి హెయిర్‌ స్టయిలిస్ట్‌ కావాలనుకుంటాడు. పట్నంలో ఇంటర్‌ పూర్తిచేసి ఊరికి వచ్చేసరికి చాచా సెలూన్‌ మూతబడుతుంది. అతను ఏమయ్యాడో తెలియదు.

ఈ పరిస్థితుల్లో ఇంజినీరింగ్‌లో సీటు వచ్చినా కాదనుకొని కటింగ్‌ షాపు పెడతానంటాడు. తండ్రి నచ్చజెప్పడంతో పంతం మాని ఇంజినీరింగ్‌లో చేరుతాడు. చదువు పూర్తయ్యాక ‘సింగపూర్‌ సెలూన్‌’ పేరుతో కార్పొరేట్‌ స్థాయిలో షాపు పెట్టాలనుకుంటాడు. ఈ క్రమంలో తన మామయ్య (సత్యరాజ్‌) దగ్గర అప్పు తీసుకుని చెన్నైలో ఓ భారీ మాల్‌లో దుకాణం తీసుకుంటాడు. అయితే, అనుకోని కారణాల వల్ల సెలూన్‌ తెరవలేకపోతాడు. తన లక్ష్యం నెరవేరే దారి లేకపోవడంతో ఆత్మహత్య చేసుకోవాలనుకుంటాడు. ఇంతకీ కదిర్‌ ఆత్మహత్య ప్రయత్నం విరమించుకున్నాడా? అకస్మాత్తుగా కనిపించకుండా పోయిన చాచా ఏమయ్యాడు? కదిర్‌ లక్ష్యం నెరవేరిందా, లేదా అన్నది మిగిలిన కథ!