Sonu Sood | ఇండిగో విమాన సంక్షోభం.. సిబ్బందికి మ‌ద్ద‌తుగా సోనూ సూద్

Sonu Sood | దేశవ్యాప్తంగా ఇండిగో విమాన సర్వీసులు రద్దు కావడం, ఆలస్యం కావడంతో విమానాశ్రయాలలో ప్రయాణికుల గందరగోళం ఇంకా కొనసాగుతున్న విష‌యం తెలిసిందే.

Sonu Sood | దేశవ్యాప్తంగా ఇండిగో విమాన సర్వీసులు రద్దు కావడం, ఆలస్యం కావడంతో విమానాశ్రయాలలో ప్రయాణికుల గందరగోళం ఇంకా కొనసాగుతున్న విష‌యం తెలిసిందే. ఈ సంక్షోభం కారణంగా వేల సంఖ్యలో ప్రయాణికులు ఇబ్బందులు పడుతున్నారు. ఈ నేపథ్యంలో ప్రయాణికులు తమ ఆగ్రహాన్ని ఎయిర్‌లైన్ సిబ్బందిపై చూపవద్దంటూ ప్రముఖ నటుడు సోనూ సూద్ విజ్ఞప్తి చేశారు. ఈ సంద‌ర్భంగా సోష‌ల్ మీడియా వేదిక‌పై ఒక వీడియోను పంచుకున్నాడు.

విమానాలు ఆలస్యం కావడం అనేది చాలా నిరాశను క‌లిగించే విష‌యం. కానీ ఈ సమస్యను పరిష్కరించడానికి ప్రయత్నిస్తున్న ముఖాలను కూడా మీరు గుర్తుంచుకోండి. దయచేసి ఇండిగో సిబ్బంది పట్ల దయగా, వినయంగా ఉండండి. ఈ రద్దు ప్రభావం వారిపై కూడా ఉంది. వారికి మన మద్దతు అవసరం. నా కుటుంబం కూడా విమానాశ్రయంలో 4-5 గంటలు వేచి ఉండాల్సి వచ్చింది. కానీ, ఇటువంటి పరిస్థితుల్లో గ్రౌండ్ సిబ్బంది (Ground Staff) నిస్సహాయులు. వారికి ముందుగా షెడ్యూల్స్ గురించి తెలియదు. వారు కేవలం పై అధికారుల నుంచి వచ్చే సందేశాలను మాత్రమే ప్రయాణికులకు అందిస్తున్నారు అని సోనూ సూద్ పేర్కొన్నారు.

డీజీసీఏ (DGCA) అమలు చేసిన కొత్త ఫ్లైట్ డ్యూటీ టైమ్ లిమిటేషన్స్ (FDTL) నిబంధనలే ఈ గందరగోళానికి ప్రధాన కారణం అయ్యాయ‌ని తెలుస్తుంది. పైలట్లకు తప్పనిసరి విశ్రాంతి సమయాన్ని పెంచడం వల్ల, ఇండిగో తమ భారీ నెట్‌వర్క్‌లో తక్షణమే సిబ్బంది కొరతను ఎదుర్కొంది. దీని ఫలితంగా గత నాలుగు రోజుల్లో దేశవ్యాప్తంగా 1,000కు పైగా విమాన సర్వీసులు రద్దు అయ్యాయి లేదా ఆలస్యమయ్యాయి.

“A delayed flight is frustrating, but remember the faces trying to fix it. Please be nice and humble to the IndiGo staff; they are carrying the weight of cancellations too. Let’s support them.” @IndiGo6E pic.twitter.com/rd3ciyekcS

— sonu sood (@SonuSood) December 6, 2025