Visit:
MS Subbulakshmi | జాతీయ స్థాయిలో తనకంటూ ప్రత్యేక గుర్తింపు తెచ్చుకున్న నటి రష్మిక మందన్నకు మరో అరుదైన అవకాశం దక్కింది. దిగ్గజ కర్ణాటక సంగీత గాయని, భారతరత్న పురస్కార గ్రహీత ఎంఎస్ సుబ్బులక్ష్మి జీవిత కథ ఆధారంగా తెరకెక్కుతున్న చిత్రంలో రష్మిక ప్రధాన పాత్రలో నటిస్తున్నారు. ఇప్పటికే ఈ ప్రాజెక్ట్పై సినీ వర్గాల్లో భారీ ఆసక్తి నెలకొనగా.. ఇప్పుడు అందరి దృష్టి రష్మిక ఫస్ట్ లుక్పైనే పడింది. ఎంఎస్ సుబ్బులక్ష్మి అంటేనే సంగీత ప్రపంచంలో ఒక ప్రత్యేకమైన శకం. ఆమె గాత్రం ఎంత ప్రత్యేకమో.. ఆమె వ్యక్తిత్వం, వేషధారణ కూడా అంతే ప్రత్యేకంగా ఉండేవి. కాంచీవరం చీరలు, సంప్రదాయ ఆభరణాలు, నుదుటిపై బొట్టు, జడలో మల్లెపూలు వంటి అంశాలు ఆమె రూపానికి ప్రత్యేక గుర్తింపును తీసుకొచ్చాయి. దీంతో తెరపై రష్మికను సుబ్బులక్ష్మిగా ఎలా తీర్చిదిద్దారనే అంశం ఇప్పుడు ప్రధాన చర్చగా మారింది.
ఈ చిత్రానికి సంబంధించిన తొలి లుక్ను ఈరోజు సాయంత్రం 5:30 గంటలకు విడుదల చేయనున్నారు. అదే సమయంలో చెన్నైలో సినిమా ప్రారంభోత్సవ కార్యక్రమం కూడా జరగనుంది. దీంతో రష్మికను ఎంఎస్ సుబ్బులక్ష్మి పాత్రలో తొలిసారి చూసేందుకు అభిమానులు, ప్రేక్షకులు ఆసక్తిగా ఎదురుచూస్తున్నారు.ముఖ్యంగా ఫస్ట్ లుక్లో రష్మిక ముఖ కవళికలు, చీరకట్టు, ఆభరణాలు, హెయిర్స్టైల్, మొత్తం రూపాన్ని ఎంతవరకు ఒరిజినల్ సుబ్బులక్ష్మిని గుర్తు చేసేలా తీర్చిదిద్దారనేది ఆసక్తికరంగా మారింది. కేవలం లుక్ను పోలి ఉండేలా చేయడం కాకుండా.. ఆ మహాగాయని హుందాతనం, ప్రశాంతత, వ్యక్తిత్వాన్ని కూడా తెరపై ప్రతిబింబించాల్సి ఉంటుంది. ఎంఎస్ సుబ్బులక్ష్మి వేషధారణ ఆమె వ్యక్తిత్వంలో ఒక ముఖ్యమైన భాగం. అందుకే ఈ చిత్రంలో కాస్ట్యూమ్స్కు ప్రత్యేక ప్రాధాన్యత ఇస్తున్నట్లు తెలుస్తోంది. ప్రముఖ డిజైనర్ నీరజ కోన ఈ చిత్రానికి వస్త్రాల రూపకల్పన చేస్తున్నారు.
సుబ్బులక్ష్మి ధరించిన సంప్రదాయ చీరలు, ఆభరణాలు, జుట్టు అలంకరణ వంటి అంశాలను పరిగణనలోకి తీసుకుని రష్మిక పాత్రకు రూపకల్పన చేసినట్లు సమాచారం. అందువల్ల ఫస్ట్ లుక్ విడుదలైన తర్వాత సోషల్ మీడియాలో కూడా ఆమె లుక్పై పెద్ద ఎత్తున చర్చ జరిగే అవకాశం ఉంది.రష్మిక ఈ పాత్రను పోషిస్తుండటంతో సహజంగానే ‘మహానటి’ చిత్రం గుర్తుకు వస్తోంది. సావిత్రి జీవిత కథ ఆధారంగా తెరకెక్కిన ఆ సినిమాలో కీర్తి సురేశ్ నటించినప్పుడు తొలుత ఆమె ఎంపికపై కొందరిలో సందేహాలు వ్యక్తమయ్యాయి. అయితే సినిమా విడుదలైన తర్వాత కీర్తి సురేశ్ తన నటనతో ప్రేక్షకులను మెప్పించారు. ఆ చిత్రం ఘన విజయం సాధించడంతో పాటు ఆమె నటనకు విస్తృత ప్రశంసలు దక్కాయి.ఇప్పుడు రష్మిక కూడా ఒక గొప్ప వ్యక్తిత్వాన్ని తెరపై ఆవిష్కరించబోతుండటంతో ‘మహానటి’తో పోలికలు రావడం సహజంగానే మారింది.
