దక్షిణాది సినిమా ఒక్కటైతే..

ప్రస్తుతం భారతీయ సినిమాలో భాషాపరమైన అంతరాలు చెరిగిపోతున్నాయి. జనరంజకమైన కథలు అన్ని భాషల్లోనూ ఆదరణ పొందుతున్నాయి. దాంతో పాన్‌ ఇండియా మూవీ ట్రెండ్‌ ఊపందుకుంటున్నది.

ప్రస్తుతం భారతీయ సినిమాలో భాషాపరమైన అంతరాలు చెరిగిపోతున్నాయి. జనరంజకమైన కథలు అన్ని భాషల్లోనూ ఆదరణ పొందుతున్నాయి. దాంతో పాన్‌ ఇండియా మూవీ ట్రెండ్‌ ఊపందుకుంటున్నది. ఈ విషయం గురించి రానా ఆసక్తికరమైన వ్యాఖ్యలు చేశారు. ఇక నుంచి దక్షిణాది సినిమాల్ని నాలుగు భాషల్లో విడుదల చేస్తే మంచి ప్రయోజనం ఉంటుందన్నారు.

అప్పుడు ప్రాంతీయ చిత్రాలనే ముద్ర చెరిగిపోయి దక్షిణాది సినిమాకు ఓ ప్రత్యేకత వస్తుందని పేర్కొన్నారు. ఉపేంద్ర కథానాయకుడిగా నటించిన ‘కబ్జా’ మూవీ ట్రైలర్‌ను బెంగళూరులో ఆవిష్కరించిన ఆయన ఓ ఆంగ్ల పత్రికతో ముచ్చటిస్తూ ఈ విషయాల్ని వెల్లడించారు. ‘సౌత్‌ సినిమాలన్నీ నాలుగు భాషల్లో విడుదలైతే మనకంటూ ఓ స్పెషల్‌ ఐడెంటిటీ వస్తుంది. దాంతో మరిన్ని గొప్ప సినిమాల్ని వీక్షించే అవకాశం దక్కుతుంది’ అని రానా పేర్కొన్నారు. కమర్షియల్‌ చిత్రాలు మొదలుకొని సమాంతర, ఆర్ట్‌ రూపాల్లో కూడా కన్నడ ఇండస్ట్రీ దేశవ్యాప్తంగా ప్రత్యేక గుర్తింపుతో దూసుకుపోతున్నదని రానా ప్రశసించారు.