Rakul Preet Singh | నాలుగేండ్లు ఆ మాటే మరిచిపోయా.. అందుకే అలా ఫిక్సయ్యానంటున్న రకుల్

Rakul Preet Singh | టాలీవుడ్‌ టు బాలీవుడ్‌ తళతళ మెరుస్తున్న తారక రకుల్‌ ప్రీత్‌ సింగ్‌. షూటింగ్‌ కోసం తరచూ విదేశాలకు వెళ్లడం తప్ప, ప్రత్యేకించి విహారానికి బయల్దేరడం తక్కువే అంటున్నదీ ముద్దుగుమ్మ. వెకేషన్‌కువెళ్తే మాత్రం.. బోలెడంత ఎంజాయ్‌ చేస్తుందట. కడలిని తలుచుకోగానే బడలిక తీరుతుందట.

Rakul Preet Singh | టాలీవుడ్‌ టు బాలీవుడ్‌ తళతళ మెరుస్తున్న తారక రకుల్‌ ప్రీత్‌ సింగ్‌. షూటింగ్‌ కోసం తరచూ విదేశాలకు వెళ్లడం తప్ప, ప్రత్యేకించి విహారానికి బయల్దేరడం తక్కువే అంటున్నదీ ముద్దుగుమ్మ. వెకేషన్‌కువెళ్తే మాత్రం.. బోలెడంత ఎంజాయ్‌ చేస్తుందట. కడలిని తలుచుకోగానే బడలిక తీరుతుందట. రకుల్‌ ట్రావెల్‌ హాబీస్‌ ఆమె మాటల్లోనే..

గడిచిన నాలుగేండ్లుగా వెకేషన్‌ అనే మాటే మర్చిపోయాను. బిజీ షెడ్యూల్స్‌తో షూటింగ్‌ జరిగే ప్రదేశాలే విహార కేంద్రాలుగా భావించే పరిస్థితి వచ్చేసింది.

షూటింగ్స్‌లో భాగంగా దేశదేశాలూ తిరుగుతున్నా.. అక్కడి వింతలు, విశేషాలు తెలుసుకునే వీలు ఎక్కడుంటుంది? అందుకే, అడపాదడపా రెండు రోజులైనా చిన్నచిన్న పర్యటనలు చేద్దామని ఫిక్సయ్యా. ఇటీవల స్కాట్లాండ్‌ వెళ్లొచ్చాను. చాలా రిలాక్స్‌డ్‌గా ఫీలయ్యాను.

నాకు నీళ్లంటే ప్రాణం. విహారానికి వెళ్తే సముద్ర తీరాలే నా మొదటి ప్రాధాన్యం. కెరటాలతో సయ్యాటలు ఆడొచ్చు. సముద్రంలో స్కూబా డైవింగ్‌, స్నోర్కెలింగ్‌, జెట్‌ స్కీయింగ్‌ వంటి సాహసాలు చేయడం అంటే సరదా! ఇష్టమైన ప్రదేశానికి వెళ్లినప్పుడే కదా.. మన మనసుకు నచ్చినట్టుగా ఉండగలుగుతాం.

సాధారణంగా వానల్లో విహారం చాలామందికి నచ్చదు. నేనూ అదే టైప్‌! ప్రకృతిని ఆస్వాదించడానికి వెళ్లినప్పుడు పొలోమని వానపడితే ఏం ఎంజాయ్‌ చేస్తం చెప్పండి? కాకపోతే, వానల్లో గోవా సముద్ర తీరానికి వెళ్లడానికి ఇష్టపడతా. చిరుజల్లుల వేళ లోనావాలా-ముంబై జర్నీ బావుంటుంది.

ఇప్పటి వరకూ నేను వెళ్లిన విహార కేంద్రాల్లో ఫిన్లాండ్‌ చాలా నచ్చింది. అక్కడి ప్రకృతి రమణీయత నన్ను కట్టిపడేసింది. ఆకాశం నుంచి భూమికి దిగివచ్చినట్టుండే కాంతిపుంజాలను అలా చూస్తూ ఉండిపోయాను. మైనస్‌ 20 డిగ్రీల ఉష్ణోగ్రతలో గడ్డకట్టిన జలపాతాలను చూసినప్పుడు థ్రిల్‌ అనిపించింది.