ఓ సినిమా హీరో కథ

‘35 చిన్న కథ కాదు’ చిత్రం ద్వారా మంచి గుర్తింపును తెచ్చుకున్నారు యువ హీరో రాచకొండ విశ్వదేవ్‌. ఆయన తాజా చిత్రం ‘డార్క్‌ చాక్లెట్‌' ఈ నెల 13న ప్రేక్షకుల ముందుకురానుంది.

‘35 చిన్న కథ కాదు’ చిత్రం ద్వారా మంచి గుర్తింపును తెచ్చుకున్నారు యువ హీరో రాచకొండ విశ్వదేవ్‌. ఆయన తాజా చిత్రం ‘డార్క్‌ చాక్లెట్‌’ ఈ నెల 13న ప్రేక్షకుల ముందుకురానుంది. డార్క్‌ కామెడీ, సర్వైవల్‌ డ్రామాగా తెరకెక్కిన ఈ చిత్రానికి శశాంక్‌ శ్రీవాస్తవ దర్శకత్వం వహించారు. రానా దగ్గుబాటి నిర్మాత. బుధవారం చిత్ర హీరో రాచకొండ విశ్వదేవ్‌ విలేకరులతో ముచ్చటించారు. సినీరంగం నేపథ్యంలో అనూహ్య మలుపులతో ఈ కథ సాగుతుందని తెలిపారు. ‘ఇందులో నా పాత్ర పేరు యజ్ఞ. తను సినిమా హీరోగా వరుసగా మూడు హిట్స్‌ కొట్టి, ఆ తర్వాత వరుస ఫ్లాపులతో సతమతమవుతుంటాడు.

ఫెయిల్యూర్స్‌ కారణంగా పిచ్చి పట్టినట్టు ప్రవర్తిస్తుంటాడు. ఫిల్మ్‌ ఛాంబర్‌ కూడా అతన్ని బ్యాన్‌ చేస్తుంది. ఈ నేపథ్యంలో అన్నీ తానై ఓ సినిమా తీద్దామనుకుంటాడు. ఈ క్రమంలో ఏం జరిగిందన్నది కథలో ఆసక్తికరం’ అన్నారు. ఇప్పటివరకు తెలుగు సినిమాలో ఈ తరహా కథాంశం రాలేదని, డార్క్‌ కామెడీ, సైకలాజికల్‌ అంశాలతో ఆద్యంతం ఉత్కంఠభరితంగా సాగుతుందని చెప్పారు. మాటలతో ప్రేక్షకుల్ని ఎంగేజ్‌ చేసేలా ఈ సినిమాలో కొత్త ప్రయోగం చేశామని, అది అద్భుతంగా వచ్చిందని తెలిపారు. తన తాతగారైన ప్రసిద్ధ రచయిత రాచకొండ విశ్వనాథ శాస్త్రి సాహిత్యాన్ని కొంత వరకు చదివానని, తనకు నృత్యం, సంగీతంపై ఆసక్తి ఎక్కువని రాచకొండ విశ్వదేవ్‌ పేర్కొన్నారు.