సిని‘మా’కోసం మనం

మూవీ ఆర్టిస్ట్‌ అసోసియేషన్‌ (మా) ఎన్నికలు తెలుగు చిత్రపరిశ్రమలో ఆసక్తికరమైన చర్చలకు తెరతీస్తున్నాయి. సెప్టెంబర్‌లో ఎన్నికలు నిర్వహించనుండగా ఇప్పటికే ఇండస్ట్రీలో వాతావరణం వేడెక్కింది. అధ్యక్ష బరిలోకి దిగబోతున్నట్లు ప్రకాష్‌రాజ్‌, మంచు విష్ణు, జీవితా రాజశేఖర్‌, హేమ ప్రకటించిన విషయం తెలిసిందే. అధ్యక్ష బరిలో నిలిచిన విలక్షణ నటుడు ప్రకాష్‌రాజ్‌ గురువారం 27 మందితో కూడిన తన ప్యానల్‌ సభ్యుల జాబితాను విడుదల చేశారు. ఈ సందర్భంగా ఆయన మాట్లాడుతూ ‘త్వరలో జరగబోయే ఎన్నికలను పురస్కరించుకొని ‘మా’ శ్రేయస్సు దృష్ట్యా.. నిర్మాణాత్మక ఆలోచనలను ఆచరణలో పెట్టే దిశగా, పదవులు కాదు..పనులు మాత్రమే చేయడం కోసం మీ అందరి ఆశీస్సులతో ‘మా’ టీమ్‌ రాబోతుంది’ అని అన్నారు. ఆయన ప్యానల్‌లో జయసుధ, శ్రీకాంత్‌, బెనర్జీ, సాయికుమార్‌, తనీష్‌, ప్రగతి, అనసూయ, సన, అనితచౌదరి, సుధ, అజయ్‌, నాగినీడు, బ్రహ్మాజీ, రవిప్రకాష్‌, సమీర్‌, ఉత్తేజ్‌, బండ్ల గణేష్‌, ఏడిద శ్రీరామ్‌, శివారెడ్డి, భూపాల్‌, టార్జాన్‌, సురేష్‌ కొండేటి, ఖయ్యుం, సుడిగాలి సుధీర్‌, గోవిందరావు, శ్రీధర్‌రావు ఉన్నారు.