బాయ్‌ఫ్రెండ్‌తో బ్రిట్నీ స్పియ‌ర్స్ ఎంగేజ్మెంట్‌

లాస్ ఏంజిల్స్ : పాప్ స్టార్ బ్రిట్నీ స్పియ‌ర్స్‌.. బాయ్‌ఫ్రెండ్ సామ్ అస్గ‌రిని ఎంగేజ్మెంట్ చేసుకున్న‌ది. సోష‌ల్ మీడియా ద్వారా ఆ వేడుక జ‌రిగింది. 39 ఏళ్ల బ్రిట్నీ త‌న ఎంగేజ్మెంట్ రింగ్‌ను ఇన్‌స్టాగ్రామ్ వీడియోలో పోస్టు చేసింది. ఇది నేనే న‌మ్మ‌లేక‌పోతున్నాన‌ని ఓ కామెంట్ పెట్టింది. ఇన్‌స్టాలో పోస్టు చేసిన వీడియోలో సామ్ కూడా ఉన్నాడు. ఆదివారం త‌మ ఎంగేజ్మెంట్ జ‌రిగిన‌ట్లు ఆ జంట ప్ర‌క‌టించింది. ఈ ఇద్ద‌రి మ‌ధ్య 2016లో తొలి ప‌రిచ‌యం జ‌రిగింది. స్లంబ‌ర్ పార్టీ మ్యూజిక్ వీడియో స‌మ‌యంలో ఇద్ద‌రూ ప్రేమ‌లో ప‌డ్డారు. వేలుకు రింగ్ తొడిగిన బ్రిట్నీ త‌న బాయ్‌ఫ్రెండ్‌ను కిస్ చేస్తున్న వీడియోను ఇన్‌స్టాలో పెట్టారు. బ్రిట్నీ పోస్టుకు ఇప్ప‌టికే ల‌క్ష‌ల సంఖ్య‌లో లైక్‌లు వ‌చ్చేశాయి.

మాజీ భ‌ర్త కెవిన్ ఫీడ‌ర్‌లైన్‌తో బ్రిట్నీ విడిపోయింది. కెవిన్‌, బ్రిట్నీ జంట‌ల‌కు ఇద్ద‌రు పిల్ల‌లు ఉన్నారు. మ‌రో చిన్న‌నాటి మిత్రుడు జేస‌న్ అలెగ్జాండ‌ర్‌నూ పెళ్లి చేసుకుంది బ్రిట్నీ. బేబీ వ‌న్ మోర్ టైమ్ సాంగ్‌తో బ్రిట్నీ పాపుల‌ర్ అయ్యారు. అయితే గ‌త 13 ఏళ్ల నుంచి బ్రిట్నీ త‌న తండ్రి సంర‌క్ష‌ణ‌లో ఉంటున్నారు.