కాంతారా చాప్టర్‌ 1లో ఛాన్సివ్వరూ.. ప్లీజ్‌

అడగందే అమ్మ అయినా అన్నం పెట్టదని పెద్దల నానుడి. అందాల భామ పాయల్‌ రాజ్‌పుత్‌కి ఈ విషయం బాగా తెలుసు. అందుకే అడిగి మరీ అవకాశాలు దక్కించుకుంటున్నది.

అడగందే అమ్మ అయినా అన్నం పెట్టదని పెద్దల నానుడి. అందాల భామ పాయల్‌ రాజ్‌పుత్‌కి ఈ విషయం బాగా తెలుసు. అందుకే అడిగి మరీ అవకాశాలు దక్కించుకుంటున్నది. ‘మంగళవారం’ సినిమా అవకాశాన్ని కూడా ఇలాగే అడిగే దక్కించుకుంది. ఈ సారి ఈ అమ్మడు కుంభస్థలానికే గురిపెట్టింది. దేశవ్యాప్త సంచలనం ‘కాంతారా’కు ప్రీక్వెల్‌గా ఆ చిత్ర దర్శక, నిర్మాత, కథానాయకుడు అయిన రిషబ్‌ శెట్టి ‘కాంతారా: చాప్టర్‌ 1’ తెరకెక్కించే పనిలో ఉన్నాడు.

ఇటీవలే ఈ సినిమాకు సంబంధించిన ఫస్ట్‌లుక్‌ కూడా విడుదలైంది. ఈ సినిమాపై మామూలుగానే అంచనాలు ఓ స్థాయిలో ఉంటే, ఈ ఫస్ట్‌లుక్‌తో అవి ఆకాశాన్ని అంటాయి. ప్రస్తుతం ఈ సినిమాకోసం ఆడిషన్స్‌ జరుగుతున్న నేపథ్యంలో ‘కాంతారా చాప్టర్‌ 1’లో తనకు అవకాశం ఇవ్వమని హీరో రిషబ్‌శెట్టికీ, చిత్ర నిర్మాణ సంస్థ హోంబాలే ఫిల్మ్స్‌కీ ట్వీట్స్‌ చేసింది పాయల్‌ రాజ్‌పుత్‌.

‘కాస్త సమయం వెచ్చించి నా ‘మంగళవారం’ సినిమా చూడండి. అందులో నా నటన మీకు నచ్చితే అవకాశం ఇవ్వండి. ఆడిషన్స్‌ ఇవ్వడానికి కూడా నేను రెడీ. ఏం చేయాలో దయచేసి చెప్పండి.’ అంటూ ఎక్స్‌(ట్విటర్‌)లో పోస్ట్‌ చేసింది పాయల్‌. ఈ పోస్ట్‌ని పలువురు నెటిజన్స్‌ రీట్వీట్‌ చేస్తూ ‘ఆమెను తీసుకోండి. ‘మంగళవారం’లో చాలాబాగా చేసింది. అందులోని శైలు పాత్ర ఆమె మాత్రమే చేయగలదు. ఆమె ట్వీట్‌కు దయచేసి స్పందించండి’ అంటూ రిషబ్‌శెట్టికీ, హోంబాలే ఫిల్మ్స్‌కూ నెటిజన్స్‌ ట్యాగ్‌ చేశారు. మరి పాయల్‌ ప్రయత్నం ఏ మాత్రం ఫలిస్తుందో చూడాలి.