ప్రేమలోకంలో విహారం

‘ప్రేమ ఔన్యత్యాన్ని చాటిచెప్పే ఆహ్లాదభరిత చిత్రమిది. టీమ్‌ అందరం ప్రేమతో ఇష్టపడి, కష్టపడి ఈ సినిమా చేశాం’ అని అన్నారు విశ్వక్‌సేన్‌. ఆయన హీరోగా నటించిన చిత్రం ‘పాగల్‌’. నరేష్‌ కుప్పిలి దర్శకుడు. దిల్‌రాజు సమర్పణలో బెక్కెం వేణుగోపాల్‌ నిర్మించారు. నివేదా పేతురాజ్‌, సిమ్రాన్‌చౌదరి కథానాయికలు. ఈ నెల 14న విడుదలకానుంది. మంగళవారం హైదరాబాద్‌లో చిత్రబృందం ట్రైలర్‌ను విడుదలచేసింది. ఈ సందర్భంగా విశ్వక్‌సేన్‌ మాట్లాడుతూ ‘థియేటర్స్‌ పరంగా అనేక సమస్యలున్నా రిస్క్‌ చేస్తూ ధైర్యంగా సినిమాను ప్రేక్షకుల ముందుకు తీసుకొస్తున్నాం. మా అందరికంటే రెండింతలు ఎక్కువగా దిల్‌రాజు ఈ సినిమాను నమ్మారు. ప్రేమ గురించి చెప్పే కథ ఇది. అంతర్లీనంగా మదర్‌ సెంటిమెంట్‌ ఉంటుంది. నా మాతృమూర్తిగా భూమిక ఈ సినిమాలో కనిపిస్తుంది’ అని తెలిపారు. దిల్‌రాజు ఇచ్చిన ధైర్యం, ప్రోత్సాహంతోనే ఈ సినిమాను విడుదల చేస్తున్నామని నిర్మాత బెక్కెం వేణుగోపాల్‌ అన్నారు. అందరినీ ప్రేమ లోకంలో విహరింపజేసే చిత్రమిదని నివేదా పేతురాజ్‌ చెప్పింది. ఈ కార్యక్రమంలో మేఘలేఖ, రాజు, గెటప్‌ శ్రీను తదితరులు పాల్గొన్నారు.