14న పాగల్‌ విడుదల

విశ్వక్‌సేన్‌, నివేదా పేతురాజ్‌, సిమ్రాన్‌ చౌదరి నాయకానాయికలుగా నటిస్తున్న చిత్రం ‘పాగల్‌’. దిల్‌రాజు సమర్పణలో బెక్కెం వేణుగోపాల్‌ నిర్మిస్తున్నారు. నరేష్‌ కుప్పిలి దర్శకుడు. ఈ నెల 14న సినిమాను విడుదలచేయబోతున్నట్లు చిత్రబృందం ప్రకటించింది. ఈ మేరకు విశ్వక్‌సేన్‌ కొత్త పోస్టర్‌ను రిలీజ్‌ చేసింది. నిర్మాత మాట్లాడుతూ ‘అద్భుతమైన ప్రేమకథా చిత్రమిది. ప్రేమలోకంలో విహరించే ఓ యువకుడికి ముగ్గురు అందాల భామలతో ఎలా పరిచయం ఏర్పడింది? వారిలో అతడిని ఎవరూ ప్రేమించారు? ఈ ముక్కోణపు ప్రేమాయణం ఎలాంటి మలుపులు తిరిగింది? అన్న అంశాలు ఆసక్తికరంగా ఉంటాయి. ఇటీవల విడుదలైన పాటలు, ప్రచార చిత్రాలకు చక్కటి స్పందన లభిస్తోంది’ అని తెలిపారు. మేఘా లేఖ, రాహుల్‌ రామకృష్ణ ముఖ్యపాత్రల్ని పోషిస్తున్న ఈ చిత్రానికి సంగీతం: రధన్‌, సినిమాటోగ్రఫీ: మణికందన్‌.