Visit:
Pathan Movie | బాలీవుడ్‌ నటుడు షారుఖ్ ఖాన్ కమ్‌బ్యాక్‌ చిత్రం పఠాన్. జనవరి 25న ప్రపంచవ్యాప్తంగా విడుదలకు సిద్ధమైంది. ప్రస్తుతం చుట్టూ వివాదాలు అల్లుకోగా.. సినిమాకు సంబంధించి అప్‌డేట్‌ బయటకు వచ్చింది. థియేటర్లలో విడుదలకు ముందే పఠాన్ సినిమా ఓటీటీ హక్కులు సైతం అమ్ముడయ్యాయి. సమాచారం మేరకు ‘పఠాన్’ మార్చి చివరిలో లేదంటే.. ఏప్రిల్ మొదటి వారంలో ఓటీటీలో విడుదల చేయనున్నట్లు తెలుస్తుంది. అయితే, దీనిపై అధికారిక ప్రకటన ఇంకా వెలువడాల్సి ఉంది. డిజిటల్ స్ట్రీమింగ్ హక్కులను అమెజాన్ ప్రైమ్ వీడియో కొన్ని కోట్ల రూపాయలకు రిజర్వ్ చేసినట్లు సమాచారం. మరో వైపు సినిమా వివాదాల్లో చిక్కుకున్న విషయం తెలిసిందే.
చిత్రంలో ‘భేషరమ్ రంగ్‌’ పాటలో దీపికా పదుకొనే కాషాయరంగు బికినీ ధరించగా.. దీనిపై హిందూ సంఘాలతో పాటు పలువురు రాజకీయ నేతలు సైతం ఆగ్రహం వ్యక్తం చేశారు. సినిమా హిందువుల మనోభావాలను దెబ్బతీసేలా ఉందని, సినిమాను బహిష్కరించాలని డిమాండ్‌ చేశారు. ఉలేమా బోర్డు సహా పలు ముస్లిం సంఘాలు సైతం సినిమాను బ్యాన్‌ చేయాలని కోరాయి. కొందరు ఎంత వ్యతిరేకించినా మరికొందరు సినిమాకు మద్దతుగా నిలువడం విశేషం. షారుఖ్ ఖాన్ దాదాపు ఏడు సంవత్సరాల తర్వాత ‘పఠాన్’ సినిమాతో మళ్లీ ప్రేక్షకుల ముందుకు వస్తుండగా.. దీపికా పదుకొనే జంటగా నటిస్తున్నది. ఈ సినిమా కోసం షారుఖ్ ఖాన్ అభిమానులు ఆసక్తిగా ఎదురుచూస్తుండగా.. రూ.250కోట్ల బడ్జెట్‌తో చిత్రాన్ని తెరకెక్కించారు.
