Visit:
హైదరాబాద్: విభిన్న కథాంశాలతో దూసుకుపోతున్న యువ నటుడు సుహాస్ కథానాయకుడిగా తెరకెక్కిన రొమాంటిక్ కామెడీ ఎంటర్‌టైనర్‌ ‘ఓ భామ అయ్యో రామ’ చిత్రం జూలై 11న ప్రపంచవ్యాప్తంగా విడుదల కానుంది. మలయాళ చిత్రం ‘జో’తో ప్రేక్షకుల హృదయాలను గెలుచుకున్న మాళవిక మనోజ్ (జో ఫేమ్) ఈ సినిమాతో తెలుగులో కథానాయికగా పరిచయమవుతోంది. రామ్ గోధల దర్శకత్వంలో వీ ఆర్ట్స్ బ్యానర్‌పై హరీష్ నల్ల ఈ చిత్రాన్ని నిర్మించారు. ఈ సందర్భంగా హైదరాబాద్‌లో జరిగిన చిత్ర ప్రీరిలీజ్ వేడుకకు రాకింగ్‌ స్టార్ మంచు మనోజ్ ముఖ్య అతిథిగా హాజరయ్యారు. ఈ వేడుకలో మంచు మనోజ్ ‘బిగ్ టికెట్’ను ఆవిష్కరించారు.
ఈ సందర్భంగా మంచు మనోజ్ మాట్లాడుతూ, “సుహాస్ నాకు సోదరుడు లాంటివాడు. ఎప్పుడూ చిరునవ్వుతో, పాజిటివ్‌గా ఉంటాడు. ఎటువంటి సినీ నేపథ్యం లేకుండా హీరోగా ఎదిగిన సుహాస్ ప్రయాణం ఎంతో స్ఫూర్తిదాయకం. నేను ఒక నెపో కిడ్‌గా చెబుతున్నాను, సినీ పరిశ్రమలో నెపో కిడ్స్ అయినా కూడా కష్టపడాల్సిందే. కష్టపడితేనే విజయం దక్కుతుంది. యూట్యూబ్ నుంచి హీరోగా ఎదిగిన సుహాస్ జర్నీ ఎంతో ఇన్‌స్పిరేషన్. తమిళంలో విజయ్ సేతుపతిలా తెలుగులో సుహాస్ కూడా అలాంటి స్టారే. అన్ని రకాల సినిమాలను చేస్తాడు. ఇండస్ట్రీలో సక్సెస్ కావడం కష్టమే, కానీ కష్టపడితే విజయం సాధిస్తాం. ఈ సినిమా విజయం సాధించి నిర్మాతలకు, దర్శకుడికి బ్రేక్ ఇవ్వాలి. మంచి టీమ్‌తో రూపొందిన ఈ సినిమా బ్లాక్బస్టర్ హిట్ కావాలి” అని ఆకాంక్షించారు.
హీరో సుహాస్ మాట్లాడుతూ, “ఈ సినిమా కోసం టీమ్ అంతా ఎంతో కష్టపడ్డారు. అందరూ ఈ సినిమా చూసిన తర్వాత మాళవిక ప్రేమలో పడిపోతారు. అలీ, అనిత, పృథ్వీ లాంటి సీనియర్ ఆర్టిస్ట్‌లతో నటించడం ఎంతో సంతోషంగా ఉంది. ప్రతి అబ్బాయి సక్సెస్‌ఫుల్ లైఫ్‌లో తల్లి, భార్యలు ఇద్దరూ ఎంతో కీలకంగా ఉంటారు. ఈ పాత్రలకు సంబంధించిన ఎమోషన్స్ ఈ చిత్రంలో అందరి హృదయాలను హత్తుకుంటాయి. అందరి సపోర్ట్‌తో మంచి సినిమాలు చేస్తున్నాను. త్వరలో నా కెరీర్‌కు సంబంధించిన మరిన్ని బిగ్ న్యూస్ తెలియజేస్తాను” అన్నారు.
నిర్మాత హరీష్ నల్లా మాట్లాడుతూ, “స్నేహితుడు ప్రదీప్ సహకారంతో సుహాస్‌తో మా జర్నీ ప్రారంభమైంది. సుహాస్ కథ ఓకే చెప్పగానే సినిమా హిట్ అనుకున్నాను. మణికందన్ ఫోటోగ్రఫీ విజువల్స్ ఈ సినిమాలో ఎంతో రిచ్‌గా ఉంటాయి. బ్రహ్మా కడలి వేసిన సెట్స్ చూస్తుంటే నాకే ఆశ్చర్యమేసింది. ఇంత తక్కువ ఖర్చుతో ఇలాంటి సెట్స్ వేశాడా అనిపించింది. రథన్ సంగీతం ఈ సినిమాకు ఎంతో ప్లస్ అయ్యింది. ఈ సినిమాకు మా టీమ్ మల్టీటాస్క్‌లు చేశారు. దర్శకుడు మంచి టీమ్‌ను సెట్ చేసుకున్నాడు. అందువల్లే ఈ రోజు మంచి అవుట్‌పుట్ వచ్చింది. రామ్‌కు దర్శకుడిగా మంచి భవిష్యత్ ఉంటుంది. సినిమా చూశాను. కొత్త దర్శకుడిలా కాకుండా ఎంతో అనుభవం ఉన్న దర్శకుడిలా చేశాడు. ఈ చిత్రంలో సుహాస్ పర్ఫార్మెన్స్ మరో రేంజ్‌లో ఉంటుంది” అని ప్రశంసించారు.
దర్శకుడు రామ్ గోధల మాట్లాడుతూ, “నేను దర్శకుడిగా మారడానికి కారణం హీరో సుహాస్, ఆ తరువాత నిర్మాత హరీష్. వాళ్లిద్దరికీ నా ధన్యవాదాలు. ఈ సినిమా తర్వాత మా హీరోయిన్ స్టార్ హీరోయిన్‌గా మారిపోతుంది. ఆమె అభినయం ఈ చిత్రంలో అందరూ చూస్తారు. ఈ సినిమాలో గెస్ట్ రోల్ చేసిన హరీష్ శంకర్, మారుతిల సహకారం మరువలేనిది. ఈ సినిమా లైఫ్‌టైమ్ మెమరీ. ఈ సినిమా చేయడానికి కారణం సుహాస్. ఆయన కోసం ఎన్నో కథలు రాస్తాను. ఎన్నో సినిమాలు తీయాలని ఉంది. స్వయం కృషితో ఎదిగిన హీరో సుహాస్‌కు తెలుగులోనే కాదు అన్ని భాషల్లోనూ మంచి పేరుంది. ఈ సినిమాలో సుహాస్ ఆల్‌రౌండర్ ప్రతిభ చూపాడు. ఓ మంచి సినిమాను సపోర్ట్ చేసిన అందరికీ నా కృతజ్ఞతలు” అన్నారు.
కమెడియన్ అలీ మాట్లాడుతూ, “సుహాస్‌కు మామయ్య పాత్రలో నటించాను. సుహాస్‌ను చూస్తుంటే ఓ కారణంతో మా అందరికీ దూరమైన నా మేనల్లుడు గుర్తొచ్చాడు. ఈ సినిమాలో లవ్ సీన్స్ ఎంతో ఎమోషనల్‌గా ఉంటాయి. ఈ సినిమా టీమ్ అంతా లవ్ మ్యారేజే చేసుకున్నారు. మాళవిక సినిమాలో ఎంతో క్యూట్‌గా ఉంది. ఈమెను చూస్తుంటే కెరీర్ మొదట్లో అనుష్కలా ఉంది. తప్పకుండా అనుష్కలా మంచి హీరోయిన్‌గా ఎదుగుతుంది. ఈ సినిమాలో నటించిన అందరికీ ఆల్ ద బెస్ట్” అన్నారు.
ఈ సమావేశంలో చిత్రలహరి బ్యానర్‌ అధినేత, ఈ చిత్రం కో ప్రొడ్యూసర్ ప్రదీప్ తాళ్ళపు రెడ్డి, హీరోయిన్ మాళవిక, నటుడు శ్రీనాథ్, దర్శకుడు విజయ్ కనకమేడల, రామ్ జగదీష్, సంజనా రెడ్డి, సంగీత దర్శకుడు రథన్, రచయిత బీవీఎస్ రవి, మరో రచయిత డార్లింగ్ స్వామి, నటులు మెయిన్, సాత్విక్, కెమెరామెన్ మణికందన్, గీత రచయితలు రామ్ గోసాల, శ్రీ హర్ష ఈమని తదితరులు పాల్గొన్నారు
