NTR30 Movie | నందమూరి అభిమానులతో పాటు ప్రేక్షకులు సైతం ఎంతో ఆత్రుతగా ఎదురు చూస్తున్న ప్రాజెక్ట్ ‘ఎన్టీఆర్30’. ‘ఆర్ఆర్ఆర్’ వంటి ఇండస్ట్రీ హిట్ తర్వాత తారక్ చేస్తున్న సినిమా కావడంతో అందరిలోనూ తీవ్ర ఆసక్తి నెలకొంది. పైగా ‘జనతా గ్యారేజ్’ వంటి బ్లాక్బస్టర్ కాంబో రిపీటవడంతో ప్రతీ ఒక్కరిలోనూ ఎక్కడలేని అంచనాలు నెలకొన్నాయి. ‘ఆచార్య’తో కోలుకోలేని దెబ్బతిన్న కొరటాల శివ ఈ సినిమాతో ఎలాగైనా గ్రాండ్ కంబ్యాక్ ఇవ్వాలని కసితో ఉన్నాడు. ఇటీవలే షూటింగ్ ప్రారంభించిన ఈ సినిమా తాజాగా మొదటి షెడ్యూల్ను పూర్తి చేసుకుంది.
తొలి షెడ్యూల్లో ఓ భారీ ఫైట్ సీన్ తెరకెక్కించినట్లు తెలుస్తుంది. మొత్తం ఈ షెడ్యూల్ తొమ్మిది రోజుల పాటు జరిగిందట. ఇక ఏప్రిల్ చివరి వారంలో రెండో షెడ్యూల్ను ప్రారంభించనున్నట్లు సమాచారం. సముద్రం నేపథ్యంలో తెరకెక్కుతున్న ఈ సినిమాకు అనిరుధ్ రవిచంద్రన్ స్వరాలు సమకూర్చుతున్నాడు. ఎన్టీఆర్కు జోడీగా జాన్వీకపూర్ నటిస్తుంది. తెలుగులో జాన్వీకి ఇదే తొలి సినిమా కావడం విశేషం. యువ సుధ ఆర్ట్స్, ఎన్టీఆర్ ఆర్ట్స్ బ్యానర్లపై రూపొందుతున్న ఈ సినిమాకు దేవర అనే టైటిల్ను పరిశీలనలో ఉంచినట్లు టాక్. ఈ సినిమా కోసం కొరటాల హాలీవుడ్ టెక్నీషియన్లను రంగంలోకి దింపాడు.