Visit:
ప్రస్తుతం రష్మిక టైమ్‌ నడుస్తున్నది. ఇండియాలోనే ఇప్పుడామె టాప్‌ హీరోయిన్‌. అందులో ఏమాత్రం సందేహం లేదు. ఆమె నటించిన ‘యానిమల్‌’ వెయ్యికోట్ల్లను కొల్లగొడితే.. ‘పుష్ప2’ ఏకంగా పద్దెనిమిది వందలకోట్ల మార్క్‌ని దాటేసింది. ఇక ‘చావా’ సినిమా అయితే.. ఇప్పటికే అయిదొందల కోట్ల మార్క్‌ని టచ్‌ చేసింది. మొత్తంగా ఆమె నటించిన మూడు సినిమాల కలెక్షన్లు కలిపితే మూడువేల కోట్ల పైమాటే. ఇప్పుడున్న ఏ హీరోయిన్‌కీ లేని రికార్డ్‌ ఇది. స్టార్‌ హీరోల సినిమాలక్కూడా ఇప్పుడామె అదనపు ఆకర్షణ. అభినయ పరంగా అయితే చెప్పాల్సిన పనేలేదు.
అందుకే.. ఈ అందాలభామ డేట్లు కోసం నిర్మాతలు క్యూ కడుతున్నారు. ఇదిలావుంటే.. రష్మికతో ఓ లేడీ ఓరియెంటెడ్‌ సినిమా నిర్మించేందుకు టాలీవుడ్‌కి చెందిన ఓ అగ్ర నిర్మాణ సంస్థ సన్నాహాలు చేస్తున్నదని టాక్‌. పాన్‌ ఇండియా స్థాయిలో ఆమెకున్న క్రేజ్‌ని దృష్టిలో పెట్టుకొని 70 నుంచి వందకోట్ల బడ్జెట్‌తో ఈ సినిమా నిర్మించనున్నారట. ప్రస్తుతం సల్మాన్‌తో ‘సికిందర్‌’లో నటిస్తూ బిజీగా ఉన్నది రష్మిక. ఆ సినిమా తర్వాత రష్మిక నుంచి బల్క్‌ డేట్లు తీసుకునేందుకు సదరు నిర్మాతలు సిద్ధమవుతున్నారట. ఈ సినిమాకు సంబంధించిన మిగతా వివరాలు త్వరలోనే వెల్లడి కానున్నాయి.
