హాలీవుడ్‌ శైలిలో ఉందంటున్నారు

‘రాజా విక్రమార్క’ ట్రైలర్‌ ైస్టెలిష్‌గా హాలీవుడ్‌ శైలిలో ఉందని ప్రశంసిస్తున్నారు. హీరోగా కార్తికేయ కెరీర్‌లో వైవిధ్యమైన సినిమాగా నిలుస్తుంది అన్నారు ఆదిరెడ్డి. ఆయన సమర్పణలో 88 రామారెడ్డి నిర్మిస్తున్న చిత్రం ‘రాజా విక్రమార్క’. కార్తికేయ హీరోగా నటిస్తున్నారు. శ్రీ సరిపల్లి దర్శకుడు. ఈ నెల 12న ప్రేక్షకుల ముందుకురానుంది. నేడు ట్రైలర్‌ను విడుదలచేయనున్నారు. ఈ సందర్భంగా చిత్ర సమర్పకుడు ఆదిరెడ్డి మాట్లాడుతూ ‘సంగీతదర్శకుడు దేవిశ్రీప్రసాద్‌ స్వగ్రామమైన వెదురుపాక నుంచి నేను ఇండస్ట్రీలో అడుగుపెట్టా. ఇదివరకు బాద్‌షా, గబ్బర్‌సింగ్‌, గ్యాంబ్లర్‌తో పాటు పలు సినిమాలకు పంపిణీదారుడిగా వ్యవహరించా. ధనుష్‌ ‘రైల్‌’ చిత్రాన్ని తెలుగులో విడుదలచేశా. నిర్మాతగా నా రెండో సినిమా ఇది. న్యూఏజ్‌ యాక్షన్‌ ఎంటర్‌టైనర్‌గా తెరకెక్కించాం. ఓటీటీ కోసం కాకుండా మంచి థియేట్రికల్‌ ఎక్స్‌పీరియన్స్‌ను ప్రేక్షకులకు అందించాలనే లక్ష్యంతోనే సినిమా చేశాం’ అన్నారు. 88రామారెడ్డి మాట్లాడుతూ ‘టీజర్‌కు ఐదు మిలియన్లకుపైగా వ్యూస్‌ లభించాయి. తెలుగు ప్రేక్షకుల అభిరుచులకు తగినట్లుగా సాగే ైస్టెలిష్‌ స్పై థ్రిల్లర్‌ చిత్రమిది. ఎన్‌ఐఏ అధికారిగా కార్తికేయ పాత్ర కొత్తగా ఉంటుంది. అతడి కెరీర్‌లో మైలురాయిగా నిలుస్తుంది. కథపై ఉన్న నమ్మకంతో నైజాంలో మేమే సొంతంగా విడుదలచేస్తున్నాం. మరో రెండు బౌండ్‌ స్క్రిప్ట్స్‌ సిద్ధంగా ఉన్నాయి. ఆ వివరాల్ని త్వరలో వెల్లడిస్తాం’ పేర్కొన్నారు.