తెలంగాణ యాసలో శిక్షణ

గత కొన్నేళ్లుగా తెలుగు వెండితెరపై తెలంగాణ యాస, భాషలు గుబాళిస్తున్నాయి. తెలంగాణ నేపథ్య కథల చిత్రణ కూడా ఎక్కువగా కనిపిస్తోంది. తెలంగాణ యాసతో పలికే సంభాషణలు సినిమాలకు కొత్త పరిమళాల్ని అద్దుతున్నాయి. అగ్ర కథానాయకులు మొదలుకొని వర్ధమాన హీరోల వరకు తెలంగాణ మాండలికంలో సంభాషణలు పలికించాలని తాపత్రయపడుతున్నారు. తాజాగా అగ్ర హీరో నాని తెలంగాణ యాసలో సంభాషణల్ని పలికే పనిలో పడ్డారు. వివరాల్లోకి వెళితే…నాని కథానాయకుడిగా నిర్మాత సుధాకర్‌ చెరుకూరి ఓ చిత్రాన్ని తెరకెక్కించబోతున్నారు. ఈ సినిమా ద్వారా శ్రీకాంత్‌ దర్శకుడిగా పరిచయమవుతున్నాడు. తెలంగాణ నేపథ్యంలో కథను తీర్చిదిద్దారట. తన పాత్రలో సహజ సంభాషణల కోసం నాని తెలంగాణ యాసలో ప్రత్యేక శిక్షణ తీసుకుంటున్నారట. ఇందుకోసం ఆయన ఓ ట్యూటర్‌ను నియమించుకున్నారని తెలిసింది. ప్రస్తుతం నాని ‘శ్యామ్‌ సింగరాయ్‌’ ‘టక్‌ జగదీష్‌’ ‘అంటే..సుందరానికి’ చిత్రాలతో బిజీగా ఉన్నారు.