‘థాంక్యూ’ అనే పదంలోనే మహత్తుదాగి ఉందని, అవసరమైన చాలా సందర్భాల్లో తాను ఈ పదాన్ని ఉపయోగిస్తానని చెప్పారు యువ హీరో నాగచైతన్య. ఆయన కథానాయకుడిగా నటించిన ‘థాంక్యూ’ చిత్రం త్వరలో విడుదలకు సిద్ధమవుతున్నది. ఈ సందర్భంగా తన ఉన్నతిలో కీలక భూమిక పోషించిన వ్యక్తులకు కృతజ్ఞతలు చెబుతూ నాగచైతన్య ట్విట్టర్లో ఓ భావోద్వేగభరితమైన పోస్ట్ పెట్టారు.
“థాంక్యూ’ సినీ ప్రయాణంలో చాలా నేర్చుకున్నా. నా జీవిత గమనంలో అండగా నిలిచిన ప్రియమైన వారికి ఈ పోస్ట్ను ఆంకితమిస్తున్నా. అమ్మ..నా బలం. జీవితంలోని ప్రతి దశలో నన్ను గొప్ప పరిణితి సాధించేలా తీర్చిదిద్దింది. నాన్న ఓ మార్గదర్శిలా, గొప్ప స్నేహితుడిలా దిశానిర్దేశం చేశారు. ఆయనకంటే ఉన్నతమైన స్నేహితుడు ఎవరూ లేరనుకుంటా. ఇక హాష్ (పెంపుడు శునకం) ఎలా ప్రేమించాలో, మానవీయ స్పృహ కలిగి ఉండాలనే విషయాల్ని నేర్పించింది. వీరందరికి థాంక్యూ. మీరు కూడా ప్రియమైన వారికి ప్రేమతో థాంక్యూ చెప్పండి’ అని నాగచైతన్య ట్విట్టర్లో పేర్కొన్నారు. ‘థాంక్యూ’ చిత్రం ఈ నెల 22న ప్రేక్షకుల ముందుకురానుంది.