Love Story | ఆ వివాదం గురించి తెలియదు

“లవ్‌స్టోరి’ సినిమాకు నేను సమకూర్చిన పాటలు, నేపథ్యసంగీతానికి చక్కటి ప్రశంసలు లభిస్తున్నాయి. తొలి సినిమాతోనే ప్రేక్షకులతో పాటు సినీ ప్రముఖుల అభిమానాన్ని చూరగొనడం ఆనందంగా ఉంది’ అని అన్నారు పవన్‌ సీహెచ్‌. ఆయన సంగీతాన్ని అందించిన చిత్రం ‘లవ్‌స్టోరి’. నాగచైతన్య హీరోగా నటించారు. శేఖర్‌కమ్ముల దర్శకుడు. ఈ నెల 24న విడుదలకానుంది. మంగళవారం పవన్‌ పాత్రికేయులతో ముచ్చటిస్తూ ‘ సినీనేపథ్యమున్న కుటుంబం మాది. మా తాత నాగేశ్వరరావు, నాన్న విజయ్‌కుమార్‌ సినిమాటోగ్రాఫర్స్‌గా మంచి గుర్తింపును తెచ్చుకున్నారు. వారి అడుగుజాడల్లోనే నేను పయనిస్తానని ఊహించలేదు. సంగీతంపై ఆసక్తితో ఏ.ఆర్‌ రెహమాన్‌ మ్యూజిక్‌ స్కూల్‌లో వెస్ట్రన్‌ క్లాసికల్‌ మ్యూజిక్‌లో డిప్లొమాతో పాటు కంపోజింగ్‌ కోర్సు పూర్తిచేశా. రెహమాన్‌ బృందంలో చాలా సినిమాలకు పనిచేశా. శేఖర్‌ కమ్ముల దర్శకత్వంలో రూపొందిన ‘ఫిదా’కు నేను సంగీతాన్ని అందించాల్సింది. అనుభవం తక్కువగా ఉండటంతో నాకు అవకాశం లభించలేదు. శేఖర్‌ కమ్ముల ‘లవ్‌స్టోరి’ సినిమా చేస్తున్నారని తెలియగానే ఆయనకు ‘ఏ పిల్లా’ పాట డెమో ట్యూన్‌ పంపించా. ఆయనకు నచ్చడంతో సంగీతదర్శకుడిగా అవకాశం ఇచ్చారు. శేఖర్‌కమ్ములకు జాననద గీతాలంటే చాలా ఇష్టం. ‘సారంగదరియా’ పాటను మళ్లీ పునసృష్టించాలనే ఐడియా ఆయనదే. ఈ గీతంపై వచ్చిన వివాదం గురించి నాకు తెలియదు. ఆ సమయంలో రీరికార్డింగ్‌ కోసం చెన్నై వెళ్లాం. సామాజిక ఇతివృత్తంతో తెరకెక్కిన సినిమా కావడంతో నేపథ్య సంగీతాన్ని అందించడం చాలెంజింగ్‌గా అనిపించింది’ అన్నారు.