Sheraz Mehdi | చిన్న సినిమాలకు అన్యాయం చేస్తే ఊరుకోం.. దర్శకుడు షెరాజ్ మెహదీ!

Sheraz Mehdi | హైదరాబాద్ నగరంలో ‘బాద్మాష్ పొట్టే’ సినిమా ప్రీ-రిలీజ్ వేడుక ఘనంగా జరిగింది. ఈ కార్యక్రమంలో ప్రముఖ దర్శకుడు, కథానాయకుడు షెరాజ్ మెహదీ ముఖ్య అతిథిగా పాల్గొని తెలుగు చిత్ర పరిశ్రమలో నెలకొన్న గుత్తాధిపత్యం, బంధుప్రీతి మరియు చిన్న నిర్మాతలకు జరుగుతున్న అన్యాయంపై తీవ్ర ఆవేదన వ్యక్తం చేశారు.

హైదరాబాద్ నగరంలో ‘బాద్మాష్ పొట్టే’ సినిమా ప్రీ-రిలీజ్ వేడుక ఘనంగా జరిగింది. ఈ కార్యక్రమంలో ప్రముఖ దర్శకుడు, కథానాయకుడు షెరాజ్ మెహదీ ముఖ్య అతిథిగా పాల్గొని తెలుగు చిత్ర పరిశ్రమలో నెలకొన్న గుత్తాధిపత్యం, బంధుప్రీతి మరియు చిన్న నిర్మాతలకు జరుగుతున్న అన్యాయంపై తీవ్ర ఆవేదన వ్యక్తం చేశారు. గత ఏడాదిన్నరగా తాను ఈ అంశాలపై పోరాటం చేస్తున్నానని వెల్లడించిన ఆయన, ముఖ్యమంత్రి రేవంత్ రెడ్డితో పాటు ప్రముఖ మల్టీప్లెక్స్ సంస్థలు, ఫిల్మ్ చాంబర్‌కు కూడా తుది నోటీసులు ఇచ్చినట్లు స్పష్టం చేశారు. తన పోరాటం దాదాపు తొంబై శాతం పూర్తయిందని, ఈ విషయంలో వెనక్కి తగ్గే ప్రసక్తే లేదని తేల్చిచెప్పారు.

సినిమా రంగంలో కొందరి ఆధిపత్యం కారణంగా కొత్తవారికి, ప్రతిభావంతులకు తగిన అవకాశాలు దక్కడం లేదని షెరాజ్ మెహదీ విమర్శించారు. నిర్మాతలు కేవలం వ్యాపార ధోరణితో కాకుండా ప్యాషన్‌తో సినిమాలు తీయాలని సూచించారు. తెలంగాణలో తెలుగు సినిమాలతో పాటు హైదరాబాద్ కేంద్రంగా రూపొందుతున్న స్థానిక చిత్రాలకు కూడా ప్రభుత్వ సబ్సిడీ అందించాలని ప్రభుత్వాన్ని డిమాండ్ చేశారు. సినిమా విడుదలైన తర్వాత నష్టాలు వస్తే కనీసం ఇరవై నుంచి ముప్పై శాతం వరకు రికవరీ అయ్యేలా సబ్సిడీ విధానం ఉండాలని ఆకాంక్షించారు.

దర్శకుడు ఫరూఖ్ ఖాన్ రూపొందించిన ‘బాద్మాష్ పొట్టే’ చిత్రంపై ఆయన ప్రశంసలు కురిపించారు. ఫరూఖ్ ఖాన్ ప్యాషన్ తనకు ఎంతో నచ్చిందని, ఈ సినిమా పెద్ద విజయం సాధించాలని కోరుకున్నారు. హైదరాబాద్ కేంద్రంగా తెరకెక్కుతున్న చిత్రాలకు తెలుగు ప్రేక్షకుల మద్దతు ఎల్లప్పుడూ ఉండాలని పిలుపునిచ్చారు. నెక్లెస్ రోడ్‌లోని సెవెన్ లేక్ వ్యూ హోటల్‌లో జరిగిన ఈ వేడుకలో చిత్ర యూనిట్ సభ్యులు, నటీనటులు పాల్గొన్నారు.