Athulya Chandra | డాక్టర్‌ను ట్రాప్ చేసి రూ.3.5 లక్షల దోపిడీ.. ‘మత్తు వదలరా’ నటి అరెస్ట్.!

Athulya Chandra | కేరళలోని కొచ్చిలో సంచలనం సృష్టించిన డాక్టర్ హనీట్రాప్ దోపిడీ కేసుకు సంబంధించి, ప్రముఖ నటి మ‌త్తు వ‌ద‌ల‌రా ఫేమ్ అతుల్య చంద్ర, నటుడు, నిర్మాత బిబిన్ పెరుంబిల్లిలను పోలీసులు అరెస్టు చేశారు.

కేరళలోని కొచ్చిలో సంచలనం సృష్టించిన డాక్టర్ హనీట్రాప్ దోపిడీ కేసుకు సంబంధించి, ప్రముఖ నటి ‘మ‌త్తు వ‌ద‌ల‌రా’ ఫేమ్ అతుల్య చంద్ర, నటుడు, నిర్మాత బిబిన్ పెరుంబిల్లిలను పోలీసులు అరెస్టు చేశారు. మెడికల్ ఎమర్జెన్సీ పేరుతో ఓ యువ డాక్టర్‌ను ఫ్లాట్‌కు రప్పించి, ఆయనపై భౌతిక దాడికి పాల్పడి రూ.3.5 లక్షల విలువైన గాడ్జెట్లు, వస్తువులను దోచుకున్న ఘటనలో ఈ అరెస్టులు జరిగాయి. కొచ్చిలోని ‘ఎసెన్ స్ప్రింగ్‌డేల్’ అపార్ట్‌మెంట్‌లోని ఒక ఫ్లాట్‌కు అత్యవసరంగా వైద్య సహాయం కావాలని చెప్పి సోమవారం తెల్లవారుజామున కొందరు వ్యక్తులు ఆ డాక్టర్‌ను రప్పించారు. అయితే, ఆ వైద్యుడు అక్కడకు చేరుకునేసరికి ఆ ఫ్లాట్‌లో దాదాపు 12 మంది వ్యక్తులు ఉన్నారు.

డాక్టర్ రాగానే, తమ బంధువుపై ఆయన అత్యాచారం చేశారంటూ నిందితులు నిరాధార ఆరోపణలు చేశారు. అంతేకాకుండా, ఈ విషయమై పోలీసులకు ఫిర్యాదు చేస్తామని బెదిరింపులకు దిగారు. నటుడు బిబిన్ పెరుంబిల్లితో పాటు మరికొందరు ఆ వైద్యుడిని కుర్చీలో కూర్చోబెట్టి చెంపదెబ్బ కొట్టి, పక్కఎముకలపై తీవ్రంగా దాడి చేశారు. అదే సమయంలో నటి అతుల్య చంద్ర ఆ డాక్టర్ మొబైల్ ఫోన్, స్మార్ట్‌వాచ్, వైర్‌లెస్ ఇయర్‌ఫోన్స్‌ను బలవంతంగా లాక్కున్నారు. అంతేకాకుండా, నువ్వు దొంగవి, నిన్ను చంపేస్తాను అంటూ ఆమె తీవ్ర పదజాలంతో బెదిరించినట్లు ఎఫ్‌ఐఆర్‌లో స్పష్టంగా నమోదైంది. మిగతా నిందితులు ఆ డాక్టర్‌ను ఒక గదిలో బంధించి దారుణంగా కొట్టారు. ఆ దాడి నుంచి ప్రాణాలతో ఎలాగోలా తప్పించుకున్న ఆ వైద్యుడు నేరుగా కడవంత పోలీస్ స్టేషన్‌కు వెళ్లి ఫిర్యాదు చేయడంతో ఈ దారుణం వెలుగులోకి వచ్చింది. ఈ కేసులో మొత్తం 12 మందిని నిందితులుగా చేర్చినట్లు పోలీసులు తెలిపారు. పరారీలో ఉన్న మిగతా నిందితుల కోసం గాలింపు చర్యలు ముమ్మరం చేశారు. ఇది కేవలం దోపిడీ కోసమే జరిగిందా లేక దీని వెనుక ఏదైనా హనీట్రాప్ (Honey-trap) కోణం ఉందా అనే కోణంలో పోలీసులు దర్యాప్తును వేగవంతం చేశారు.