Ginna Movie | హార్ర‌ర్ క‌థ‌తో రాబోతున్న మంచు విష్ణు.. ఆస‌క్తికరంగా ‘జిన్నా’ టీజ‌ర్‌

September 9, 2022 / 02:12 PM IST

Ginna Movie Teaser | ఫ‌లితం ఎలా ఉన్నా మంచు విష్ణు మాత్రం వ‌రుస సినిమాల‌తో ఎంట‌ర్టైన్ చేస్తుంటాడు. గ‌తేడాది ‘మోస‌గాళ్ళు’ సినిమాతో భారీ ఫ్లాప్‌ను సాధించిన‌ మంచు విష్ణు ఈ సారి ఎలాగైనా ‘జిన్నా’తో మంచి కంబ్యాక్ ఇవ్వాల‌ని కసితో ఉన్నాడు. ఇషాన్ సూర్య ద‌ర్శ‌కుడిగా ప‌రిచ‌య‌మ‌వుతూ ఈ చిత్రాన్ని తెర‌కెక్కిస్తున్నాడు. ఇప్ప‌టికే చిత్రం నుండి విడుద‌లైన గ్లింప్స్‌కు ప్రేక్ష‌కుల నుండి విశేష స్పంద‌న వ‌చ్చింది. తాజాగా మేక‌ర్స్ ఈ సినిమా టీజ‌ర్‌ను విడుద‌ల చేశారు.

లేటెస్ట్‌గా విడుద‌లైన జిన్నా టీజ‌ర్‌ ప్రేక్ష‌కులను ఆక‌ట్టుకుంటుంది. టెంట్ హౌజ్‌కు ఓన‌ర్‌గా మంచు విష్ణు ఈ చిత్రంలో క‌నిపించ‌నున్నాడు. జిన్నా టైంకు రావ‌డంతో పాటు బ్యాడ్ టైంను కూడా తీసుకొస్తుంటాడు అంటూ విష్ణు క్యారెక్ట‌ర్‌ను ఇంట్ర‌డ్యూస్ చేస్తారు. ఏ ప‌ని చేయ‌కుండా.. ఊరంత అప్పులు చేస్తూ గ‌డుపుతున్నా విష్ణు లైఫ్‌లోకి సన్నీలియోని ఎంట్రీ ఇస్తుంది. అయితే సన్నీలియోనికు దెయ్యం ప‌ట్టిన‌ట్లు టీజ‌ర్ చూస్తే తెలుస్తుంది. మ‌రి ఆ దెయ్యం వెనుక క‌థ ఏంటి? ఆ దెయ్యం నుండి సన్నీలియెనిను విష్ణు ఎలా కాపాడాడు? అనే నేప‌థ్యంలో సినిమా ఉండ‌నున్న‌ట్లు తెలుస్తుంది. టీజ‌ర్ చూస్తుంటే చాలా కాలం త‌ర్వాత మంచు విష్ణు హిట్టు కొట్ట‌బోతున్న‌ట్లు అనిపిస్తుంది.

ఈ చిత్రంలో విష్ణుకు జోడీగా పాయ‌ల్ రాజ్‌పుత్ న‌టించింది. గాలి నాగేశ్వ‌ర‌రావు పాత్ర‌లో మంచు విష్ణు క‌నిపించ‌నున్నాడు. ప్ర‌ముఖ ర‌చ‌యిత, నిర్మాత కోన‌వెంక‌ట్ ఈ చిత్రానికి క‌థ‌, స్క్రీన్‌ప్లే అందించ‌డంతో పాటు క్రీయేటీవ్ ప్రొడ్యూస‌ర్‌గా వ్య‌వ‌హ‌రిస్తున్నాడు. అవ ఎంట‌ర్టైన‌మెంట్స్ నిర్మిస్తున్న ఈ చిత్రానికి అనూప్ సంగీతాన్ని స్వ‌ర ప‌రుస్తుండ‌గా చోటా కే నాయుడు సినిమాటోగ్రాఫ‌ర్‌గా పనిచేస్తున్నాడు. ఫ్యామిలీ ఎంట‌ర్టైన‌ర్‌గా తెర‌కెక్కుతున్న‌ ఈ చిత్రాన్ని ద‌స‌రా కానుక‌గా అక్టోబ‌ర్ 5న‌ ప్రేక్ష‌కుల ముందుకు తీసుకురావాల‌ని మేక‌ర్స్ ప్లాన్ చేస్తున్నారు.