Visit:
Aasmaan | దివంగత నటుడు, రియల్ స్టార్ శ్రీహరి వారసుడిగా ఆయన కుమారుడు మేఘాంశ్ హీరోగా పరిచయం అవుతున్న తాజా చిత్రం ‘ఆస్మాన్’. రామ్ నందన్ దర్శకత్వంలో తెరకెక్కుతున్న ఈ యాక్షన్ హర్రర్ సినిమాకు సంబంధించిన టీజర్ను మేకర్స్ తాజాగా విడుదల చేశారు. “మీరిప్పుడు గొంగళి పురుగు దశలో ఉన్నారు.. అది దాటి సీతాకోకచిలుక దశలోకి మారాలి” అనే ఆసక్తికరమైన డైలాగ్తో ప్రారంభమైన ఈ టీజర్ ఆద్యంతం ఉత్కంఠను రేకెత్తిస్తోంది. ఒక చర్చి బ్యాక్డ్రాప్, మిస్టరీ ట్రాన్స్లో ఉన్న వ్యక్తులు, హీరోయిన్ కోసం హీరో చేసే పోరాట సన్నివేశాలు సినిమాపై అంచనాలను పెంచేస్తున్నాయి. సస్పెన్స్ మరియు థ్రిల్లింగ్ అంశాలతో సాగే ఈ చిత్రంలో మేఘాంశ్ రగ్గడ్ లుక్లో కనిపించి ఆకట్టుకున్నారు.
శ్రీ క్లింకార సెల్యులాయిడ్ బ్యానర్పై కొండారు శ్రీనివాస్ రావు సమర్పణలో ఈ సినిమా రూపొందుతోంది. ఇందులో మేఘాంశ్ సరసన రాయంచ హీరోయిన్గా నటిస్తుండగా.. రవి వర్మ, కమల్ కేశవ, దీపక్, నిఖిల్ తదితరులు కీలక పాత్రలు పోషిస్తున్నారు. కేవలం తెలుగులోనే కాకుండా తమిళ, మలయాళ, కన్నడ మరియు అరబిక్ భాషల్లో కూడా ఈ చిత్రాన్ని పాన్-ఇండియా రేంజ్లో విడుదల చేయడానికి సన్నాహాలు చేస్తున్నారు. త్వరలోనే ఈ సినిమా అధికారిక విడుదల తేదీని ప్రకటించనున్నారు. శ్రీహరి లెగసీని కొనసాగిస్తూ మేఘాంశ్ ఈ చిత్రంతో ఎలాంటి విజయాన్ని అందుకుంటారో వేచి చూడాలి.
