Kanna Kanna Video Song | అడివిశేష్ హీరోగా శశికిరణ్ టిక్కా దర్శకత్వంలో తెరకెక్కిన లేటెస్ట్ చిత్రం ‘మేజర్’. ముంబై బాంబు దాడుల్లో అమర వీరుడైన మేజర్ సందీప్ ఉన్నికృష్ణన్ జీవిత కథ ఆధారంగా రూపొందిన ఈ చిత్రం జూన్ 3న విడుదలై సంచలన విజయం సాధించింది. మేజర్ సందీప్ పాత్రలో శేష్ జీవించాడు. శేష్ కెరీర్లోనే బిగ్గెస్ట్ ఓపెనింగ్స్, హైయెస్ట్ కలెక్షన్స్ సాధించిన చిత్రంగా మేజర్ నిలిచింది. పోటీగా విక్రమ్ సినిమా ఉన్నా మేజర్ మంచి వసూళ్ళను సాధించింది. ఈ చిత్రంతో శేష్ 60కోట్ల క్లబ్లోకి అడుగుపెట్టి టైర్2 హీరోలలో టాప్5లో చోటు దక్కించుకున్నాడు. ఈ చిత్ర విజయంలో సంగీత దర్శకుడు శ్రీ చరణ్ పాకాలకు సగం వరకు క్రెడిట్ దక్కుతుంది. ఈ చిత్రంలో పాటలు, నేపథ్య సంగీతం ప్రేక్షకులను విపరీతంగా ఆకట్టుకున్నాయి.
తాజాగా మేకర్స్ ఈ చిత్రంలోని ‘కన్నా కన్నా’ అంటూ సాగే ఎమోషనల్ సాంగ్ను విడుదల చేశారు. హీరోకు పేరెంట్స్కు మధ్య ఉండే ఎమోషనల్ థీమ్ను దర్శకుడు ఈ పాటలో అద్భుతంగా చూపించాడు. శ్రీ చరణ్ పాకాల ట్యూన్ మంచి ఫీల్ను కలిగిస్తుంది. రామజోగయ్య శాస్త్రీ సాహిత్యం అందించిన ఈ పాటకు కే.ఎస్ చిత్ర తన గాత్రంతో ప్రాణం పోసింది. బయోగ్రాఫీకల్ యాక్షన్ డ్రామాగా తెరకెక్కిన ఈ చిత్రాన్ని జీఎంబీ ఎంటర్టైనమెంట్స్, సోనీ పిక్చర్స్ ఫిల్మ్స్ ఇండియా, ఏ+ఎయస్ మూవీస్ సంస్థలు సంయుక్తంగా నిర్మించాయి. అడివిశేష్కు జోడీగా సాయి మంజ్రేకర్ హీరోయిన్గా నటించింది. ప్రకాష్ రాజ్, రేవతి, శోభితా ధూళిపాల కీలక పాత్రల్లో నటించారు.