మాలాంటి మిత్రులు ఈ తరంలో లేరు

నిజమైన స్నేహం చిరకాలం నిలిచే ఉంటుంది. రజనీకాంత్‌, కమల్‌హాసన్లను ఇందుకు ఉదాహరణగా చెప్పుకోవాలి. కెరీర్‌ తొలినాళ్లలో ఇద్దరు కలిసి డజనుకు పైగా సినిమాల్లో నటించారు.

నిజమైన స్నేహం చిరకాలం నిలిచే ఉంటుంది. రజనీకాంత్‌, కమల్‌హాసన్లను ఇందుకు ఉదాహరణగా చెప్పుకోవాలి. కెరీర్‌ తొలినాళ్లలో ఇద్దరు కలిసి డజనుకు పైగా సినిమాల్లో నటించారు. ఆ తర్వాత హీరోలుగా ఎదిగారు. స్టార్లయ్యారు. సూపర్‌స్టార్లయ్యారు. కెరీర్‌ పరంగా నువ్వానేనా అనే పోటీ మొదట్నుంచీ ఉన్నా.. ఎప్పుడూ ఇద్దరిమధ్య విభేదాలు రాలేదు. అదీ స్నేహమంటే. రీసెంట్‌గా సైమా అవార్డుల వేడుకలో ‘విక్రమ్‌’ సినిమాకు గాను ఉత్తమనటుడిగా అవార్డును అందుకున్న కమల్‌, తన మిత్రుడు రజనీకాంత్‌ గురించి వేదికపై మాట్లాడారు.

‘మాలాంటి స్నేహితులు ఈ తరంలో లేరు. మాకు ఇగోలు ఉండవు. ఎవరికి సక్సెస్‌ వచ్చినా ఇద్దరం ఆనందిస్తాం. దర్శకుడు లోకేశ్‌ కనకరాజ్‌ నా వీరాభిమాని. అతను రజనీని డైరెక్ట్‌ చేయనున్నట్టు ఇటీవల ప్రకటించాడు. ‘మీ అభిమాని రజనీతో సినిమా చేయటమేంటి?’ అని కొందరు నాతో అన్నారు. సాధారణ ప్రేక్షకులకు రజనీ, కమల్‌ అంటే పోటీ హీరోలు. కానీ వాళ్లకు తెలియని విషయం ఏంటంటే.. రజనీ, కమల్‌ ప్రాణస్నేహితులు. పదిహేనేళ్ల క్రితం ‘కమల్‌ 50’ అనే కార్యక్రమంలో నా మిత్రుడు రజనీ గురించి మాట్లాడాను. ఇప్పుడు మళ్లీ మాట్లాడాలనిపిస్తుంది. మా మధ్య విపరీతమైన పోటీ ఉండేది. కానీ అది ఆరోగ్యకరంగానే ఉండేది. ఓ విధంగా మేం ఈ రోజు ఈ స్థాయిలో ఉండటానికి కారణం ఆ పోటీనే’ అని చెప్పుకొచ్చారు కమల్‌.