మంగళవారం అగ్ర నటుడు చిరంజీవి జన్మదినోత్సవాన్ని పురస్కరించుకొని ఆయన 157వ చిత్రాన్ని ప్రకటించారు. ‘బింబిసార’ ఫేమ్ వశిష్ట దర్శకత్వం వహించనున్న ఈ సినిమాను సోషియోఫాంటసీ కథాంశంతో తెరకెక్కించబోతున్నారు. యూవీ క్రియేషన్స్ పతాకంపై వీ. వంశీకృష్ణారెడ్డి, ప్రమోద్ ఉప్పలపాటి, విక్రమ్ రెడ్డి నిర్మించనున్నారు. ఈ సందర్భంగా విడుదల చేసిన అనౌన్స్మెంట్ పోస్టర్ ఆసక్తిని రేకెత్తిస్తున్నది. పంచభూతాలను ప్రతిబింబించే థీమ్తో ఈ పోస్టర్ను డిజైన్ చేశారు. ‘మెగా మాస్ బియాండ్ యూనివర్స్’ అంటూ చిత్ర నిర్మాణ సంస్థ ఈ పోస్టర్కు క్యాప్షన్ను జత చేసింది. ‘అంజి’ (2004) తర్వాత మరలా చిరంజీవి సోషియో ఫాంటసీ కథాంశంతో సినిమా చేస్తుండటం అభిమానుల్లో ఆసక్తిని పెంచుతున్నది. చిరంజీవి కెరీర్లోనే అత్యంత భారీ వ్యయంతో ఈ సినిమాకు సన్నాహాలు చేస్తున్నామని నిర్మాణ సంస్థ పేర్కొంది.
పుట్టినరోజు సందర్భంగా చిరంజీవి నటించబోతున్న 156వ సినిమా ప్రకటన కూడా వెలువడింది. ఈ చిత్రానికి ఆయన కుమార్తె సుస్మిత కొణిదెల నిర్మాతగా వ్యవహరించనుంది. గోల్డ్ బాక్స్ ఎంటర్టైన్మెంట్స్ పతాకంపై ఆమె ఈ చిత్రాన్ని తెరకెక్కించబోతున్నది. ఈ చిత్ర దర్శకుడితో పాటు ఇతర సాంకేతిక నిపుణుల వివరాలను త్వరలో వెల్లడించనున్నారు.