Film Federation | టాలీవుడ్ డాన్సర్స్ అసోసియేషన్‌కు ఫిల్మ్ ఫెడరేషన్ భారీ షాక్.. ఇకపై ఎలాంటి మద్దతు లేదని ప్రకటన!

Film Federation | టాలీవుడ్ సినీ పరిశ్రమలో డాన్సర్స్ అసోసియేషన్‌కు ఫిల్మ్ ఫెడరేషన్ అనూహ్య రీతిలో షాకిచ్చింది. అసోసియేషన్ వ్యవహారశైలిపై తీవ్ర అసంతృప్తి వ్యక్తం చేసిన ఫెడరేషన్, ఇక నుంచి ఎలాంటి సహాయ సహకారాలు అందించబోమని అధికారికంగా స్పష్టం చేసింది.

Film Federation | టాలీవుడ్ సినీ పరిశ్రమలో డాన్సర్స్ అసోసియేషన్‌కు ఫిల్మ్ ఫెడరేషన్ అనూహ్య రీతిలో షాకిచ్చింది. అసోసియేషన్ వ్యవహారశైలిపై తీవ్ర అసంతృప్తి వ్యక్తం చేసిన ఫెడరేషన్, ఇక నుంచి ఎలాంటి సహాయ సహకారాలు అందించబోమని అధికారికంగా స్పష్టం చేసింది. ఈ మేరకు డాన్సర్స్ అసోసియేషన్ అధ్యక్షుడిగా ఉన్న జానీ మాస్టర్ సతీమణి సుమలత అనుసరిస్తున్న ఏకపక్ష ధోరణే ఈ నిర్ణయానికి ప్రధాన కారణమని ఫెడరేషన్ విడుదల చేసిన లేఖలో స్పష్టం చేసింది. మెగాస్టార్ చిరంజీవితో పాటు ఫిల్మ్ ఫెడరేషన్, ఫిల్మ్ ఛాంబర్ తీసుకున్న నిబంధనలను బేఖాతరు చేస్తూ సొంత నిర్ణయాలు అమలు చేయడం పట్ల తీవ్ర అభ్యంతరం వ్యక్తం చేశారు.

కొన్ని రోజుల క్రితం సస్పెన్షన్‌కు గురైన సభ్యులను మళ్లీ అసోసియేషన్‌లోకి ఆహ్వానించి, అందరితో కలిసి నడవాలని కౌన్సిల్ సమావేశంలో స్పష్టమైన ఆదేశాలు ఇవ్వడమే కాకుండా తగిన సమయం కూడా కేటాయించామని ఫెడరేషన్ గుర్తుచేసింది. అయితే, ఈ హెచ్చరికలను మరియు పెద్దల నిర్ణయాలను పూర్తిగా పట్టించుకోకపోవడం వల్లే అనివార్యంగా ఈ కఠిన చర్యలు తీసుకోవాల్సి వచ్చిందని వివరించింది. ఇక మీదట డాన్సర్స్ అసోసియేషన్‌కు తలెత్తే ఏ చిన్న సమస్య పరిష్కారంలోనూ తాము జోక్యం చేసుకోబోమని, బాధ్యత వహించమని కుండబద్దలు కొట్టింది. అంతేకాకుండా, భవిష్యత్తులో ఫిల్మ్ ఛాంబర్‌తో జరిగే వేతనాల సవరణ ఒప్పందాల్లో సైతం ఆ అసోసియేషన్‌కు ఫెడరేషన్ నుంచి ఎలాంటి మద్దతు ఉండదని తేల్చిచెప్పింది.