నేను సింగిల్‌

ప్రస్తుతం తాను ఒంటరినని, ఎవరితో ప్రేమలో లేనని అంటోంది గోవా సొగసరి ఇలియానా. ఏకాంత జీవితాన్ని పరిపూర్ణంగా ఆస్వాదిస్తున్నానని అంటోంది. ఆస్ట్రేలియన్‌ ఫొటోగ్రాఫర్‌ ఆండ్రూనీబోన్‌తో సుదీర్ఘకాలం పాటు సాగిన ప్రేమబంధానికి గత ఏడాది వీడ్కోలు పలికింది ఇలియానా. మనస్పర్థల కారణంగా వారు విడిపోయినట్లుగా వార్తలొస్తున్నాయి. ఈ ఎడబాటు గురించి ఇలియానా ఇప్పటివరకు పెదవివిప్పలేదు. ప్రేమ, పెళ్లి లాంటి బంధాల పట్ల తన అభిప్రాయాలను గురించి ఇలియానా వెల్లడిస్తూ ‘పందొమ్మిదేళ్ల వయసులో తొలిసారి ప్రేమలోని మాధుర్యామేమిటో తెలుసుకున్నా. అయితే కొద్ది రోజుల్లోనే ఆ ప్రణయబంధానికి అనుకోకుండా ముగింపు పలకాల్సివచ్చింది. ప్రేమంటే నా దృష్టిలో సొంత ఇంట్లో అడుగుపెట్టడం లాంటింది. మనసుకు ఓదార్పుతో పాటు అపరిమితమైన ఆనందాన్ని ఇస్తుంది. కానీ ప్రేమకు ముగింపు పడితే ఎంతో వేదనను అనుభవించాల్సివస్తుంది. స్నేహితులు, కుటుంబతోడ్పాటుతో బ్రేకప్‌ తాలూకు బాధ నుంచి నేను బయటపడగలిగా. వివాహం విషయంలో ఒక్కొక్కరి ఆలోచనలు ఒక్కోలా ఉంటాయి. పెళ్లనేది అందరికీ ఆనందాన్ని ఇవ్వలేదు. నేను పెళ్లి విషయంలో ఎన్నో కలలు కన్నా. కానీ అవేవీ ఫలించలేదు’ అంటూ తాత్వికంగా సమాధానమిచ్చింది.