Sridevi Soda Center | ప్రతి ఒక్కరూ చూడాల్సిన చిత్రం

‘సుధీర్‌బాబు కెరీర్‌లోనే అద్భుతమైన నటనను కనబరిచిన చిత్రమిది. చక్కటి హావభావాలను కనబరుస్తూ సూరిబాబు పాత్రలో ఒదిగిపోయారు’ అని అన్నారు అగ్రనటుడు మహేష్‌బాబు. ‘శ్రీదేవి సోడా సెంటర్‌’ చిత్రాన్ని ఇటీవల ప్రత్యేకంగా వీక్షించారాయన. సుధీర్‌బాబు హీరోగా నటించిన ఈ చిత్రానికి కరుణకుమార్‌ దర్శకత్వం వహించారు. విజయ్‌ చిల్లా, శశిదేవిరెడ్డి నిర్మించారు. గత శుక్రవారం ఈ చిత్రం ప్రేక్షకుల ముందుకొచ్చింది. సినిమాను వీక్షించిన అనంతరం మహేష్‌బాబు మాట్లాడుతూ ‘మహిళా ప్రేక్షకులను మెప్పించే సినిమా ఇది. సుధీర్‌బాబు, ఆనంది పాత్రలు బాగున్నాయి. బోట్‌ రేసింగ్‌ సన్నివేశాల్ని విలక్షణంగా తెరకెక్కించారు. జైలు నేపథ్యంలో వచ్చే సన్నివేశాల్లో సుధీర్‌బాబు నటన, ఆయనపై చిత్రీకరించిన యాక్షన్‌ ఎపిసోడ్స్‌ బాగున్నాయి. ఇలాంటి మంచి సినిమాల్ని ప్రేక్షకులు ఆదరించినప్పుడు సందేశం అందరికీ చేరువవుతుంది. ప్రతి ఒక్కరూ చూడాల్సిన సినిమా ఇది’ అని తెలిపారు. మహేష్‌బాబు ప్రశంసల పట్ల చిత్రబృందం సంతోషాన్ని వ్యక్తంచేసింది.