Venu Yeldandi | బుల్లితెరతో పాటు దాదాపు రెండు వందల చిత్రాల్లో హాస్య నటుడిగా ప్రేక్షకుల్ని నవ్వించిన వేణు యెల్దండి దర్శకుడిగా మారి రూపొందించిన సినిమా ‘బలగం’. ప్రియదర్శి, కావ్య కళ్యాణ్ రామ్, సుధాకర్ రెడ్డి, మురళీధర్ గౌడ్ తదితరులు ప్రధాన పాత్రల్లో నటించారు. ఈ చిత్రాన్ని దిల్ రాజు ప్రొడక్షన్స్పై శిరీష్ సమర్పణలో హర్షిత్ రెడ్డి, హన్షిత నిర్మించారు. ఇటీవలే విడుదలైన ‘బలగం’ సినిమా ప్రేక్షకాదరణ పొందుతున్నది. ఈ నేపథ్యంలో చిత్ర విజయంపై తాజా ఇంటర్వ్యూలో తన ఆనందాన్ని వ్యక్తపరిచారు వేణు యెల్దండి.
దాదాపు ఇరవై ఏండ్లుగా నన్ను ప్రేక్షకులు తెరపై చూస్తున్నారు. రెండు వందల చిత్రాల్లో నటించాను. అయితే రావాల్సినంత గుర్తింపు రాలేదు. నటిస్తూనే కథలు రాసే పనిలో నిమగ్నమయ్యాను. అలా కొన్ని చిత్రాలకు పనిచేశాను. వాటిలో రాసిన సన్నివేశాలు, మాటలకు పేరొచ్చింది. అలాంటప్పుడు నేనే దర్శకత్వం చేయవచ్చు కదా అనిపించింది. నాపై మరాఠీ, మలయాళ, తమిళ చిత్రాల ప్రభావం ఎక్కువ. వాటిలో సహజత్వం ఉంటుంది. నటనకు ఆస్కారమూ ఎక్కువే. అలాంటి కథను రాయాలని ప్రయత్నించాను.
మా ఇంట్లో నేను తొమ్మిదో సంతానం. మాది పెద్ద కుటుంబం. బంధువులు చాలా మంది ఉండేవారు. ఇంట్లో ఏ కార్యక్రమం చేసుకున్నా జాతరలా జరిగేది. మా నాన్న చనిపోయినప్పుడు సంప్రదాయంగా జరిపే కొన్ని కార్యక్రమాలు చేశాం. కుటుంబంలో ఎవరైనా చనిపోతే ఏడుపులు, పెడ బొబ్బలు, తినడాలు, తాగడాలు, మళ్లీ ఏడవటాలు వంటివి చూశాను. ఇవన్నీ నాలో బలగం కథ గురించిన ఆలోచన పుట్టించాయి. ఈ చిత్రంలోని కొమురయ్య పాత్రకు మా పెదనాన్న రాఘవులు స్ఫూర్తి. మా పెదనాన్న, పెద్దమ్మ చనిపోయినప్పుడు ఊరెళ్లి మా అన్నను ఓదార్చాను. ఆయన నాతో తమ్ముడూ..అమ్మా నాన్నలది 80 ఏండ్ల అనుబంధం. నాన్న వెళ్లిపోయాడు. ఆయన ఎడబాటు తట్టుకోలేక అమ్మ ఆయన కోసం వెళ్లింది. మాకేం బాధ లేదు అన్నాడు. ఆ మాటతో నాలో ఆలోచన మొదలైంది. ఇదే నా కథలో కీలకంగా తీసుకున్నా. మిత్రులు నన్ను దిల్ రాజు దగ్గరకు తీసుకెళ్లారు. ఆయనకు కథ నచ్చడంతో ఈ ప్రాజెక్ట్ దిల్ రాజు ప్రొడక్షన్స్లోకి వచ్చింది.
సినిమా రూపకల్పన నేను పుట్టి పెరిగిన సిరిసిల్లలోనే చేశాను. మా సినిమా చూసి చిరంజీవి గారు ఇచ్చిన ప్రశంసలు మర్చిపోలేను. మా సినిమాకు కమర్షియల్గా ఇంత భారీ వసూళ్లు రావడానికి నిర్మాత దిల్ రాజు ప్లాన్ కారణం. సినిమాకు దిల్ రాజు గారు చెప్పిన అనేక సూచనలు ఇవాళ తెరపై వర్కవుట్ అయ్యాయి. ఓటీటీ సినిమాల సక్సెస్ ఈ సినిమా చేసేందుకు నాకు ధైర్యాన్ని, స్ఫూర్తినిచ్చాయి. ఇకపై దర్శకత్వంతో పాటు నటుడిగానూ కొనసాగుతాను.