లక్కీ మీడియా సంస్థలో ‘టాటా బిర్లా మధ్యలో లైలా’, ‘సినిమా చూపిస్త మావ’, ‘మేం వయసుకు వచ్చాం’ వంటి పలు హిట్ చిత్రాలను నిర్మించారు నిర్మాత బెక్కెం వేణుగోపాల్. ప్రస్తుతం ఆయన ప్రొడక్షన్లో శ్రీవిష్ణు హీరోగా నటిస్తున్న ‘అల్లూరి’, సోహైల్ కథానాయకుడిగా ‘బూట్ కట్ బాలరాజు’ చిత్రాలు సెట్స్ మీద ఉన్నాయి. మరికొన్ని చిత్రాలకు చర్చలు జరుగుతున్నాయి. బుధవారం బెక్కెం వేణుగోపాల్ పుట్టినరోజు సందర్భంగా పాత్రికేయ సమావేశం ఏర్పాటు చేశారు. ఈ సందర్భంగా ఆయన మాట్లాడుతూ…‘నేను నిర్మాతగా మారి 16 ఏండ్లవుతున్నది. ఇంత పోటీలోనూ నా ప్రొడక్షన్లో విజయవంతమైన చిత్రాలు నిర్మించగలిగాం. మంచి కథలను ఎంపిక చేసుకోవడమే మా సంస్థ సక్సెస్కు కారణం.
ప్రస్తుతం శ్రీవిష్ణు హీరోగా ‘అల్లూరి’ సినిమా షూటింగ్ చివరి దశలో ఉంది. సోహైల్ ‘బూట్ కట్ బాలరాజు’ రెగ్యులర్ చిత్రీకరణ జరుపుకుంటున్నది. ఇంకొన్ని కథలు ఫైనలైజ్ చేస్తున్నాం. నేను మీడియా నుంచే వచ్చాను కాబట్టి జర్నలిజం నేపథ్యంలో పాత్రికేయులు గర్వపడే ఓ సినిమా నిర్మించాలని ప్లాన్ చేస్తున్నాం. ఇందులో మీడియా గొప్పదనం చూపించబోతున్నాం. ఈ ఏడాది కనీసం మూడు చిత్రాలను చేయాలని సన్నాహాల్లో ఉన్నాం. ఏ వ్యాపారం అయినా అవగాహన తెచ్చుకున్నాకే చేయాలి. అలాగే చిత్ర నిర్మాణం గురించి తెలిసిన వాళ్లే నిర్మాతలుగా అడుగుపెట్టాలి. లేకుంటే తొలి చిత్రానికే నష్టాలు చూసి ఇండస్ట్రీ నుంచి వెళ్లిపోవాల్సి వస్తుంది’ అని అన్నారు.