Biker Movie | స్పీడ్.. థ్రిల్.. ఎమోషన్.. శర్వానంద్ ‘బైకర్’ మూవీ ఎలా ఉందంటే?

Biker Movie | వైవిధ్యభరితమైన కథాంశాలతో ఎప్పుడూ ప్రేక్షకులను అలరించే హీరో శర్వానంద్, ఈసారి సరికొత్త స్పోర్ట్స్ డ్రామా 'బైకర్'తో ప్రేక్షకుల ముందుకు వచ్చారు.

Biker Movie | వైవిధ్యభరితమైన కథాంశాలతో ఎప్పుడూ ప్రేక్షకులను అలరించే హీరో శర్వానంద్, ఈసారి సరికొత్త స్పోర్ట్స్ డ్రామా ‘బైకర్’తో ప్రేక్షకుల ముందుకు వచ్చారు. టాలీవుడ్‌లో ఇప్పటివరకూ స్పృశించని ‘మోటోక్రాస్ రేసింగ్’ నేపథ్యంతో రూపొందిన ఈ చిత్రం ఏప్రిల్ 3, 2026న విడుదలైంది. ప్రముఖ నటుడు రాజశేఖర్ కీలక పాత్రలో నటించిన ఈ సినిమా రివ్యూ ఎలా ఉందో ఇప్పుడూ చూద్దాం.

కథ
వికాస్ నారాయణ్ అలియాస్ విక్కీ (శర్వానంద్) ఒక అద్భుతమైన మోటోక్రాస్ రేసర్. చిన్నప్పటి నుంచి తన తండ్రి సునీల్ నారాయణ్ (రాజశేఖర్) పర్యవేక్షణలో కఠినమైన శిక్షణ పొంది, రేసింగ్‌లో అగ్రస్థానానికి చేరుకుంటాడు. అయితే, అనూహ్యంగా విక్కీ రేసింగ్‌కు స్వస్తి చెప్పి తండ్రిని ఇబ్బందికర పరిస్థితిలోకి నెడతాడు. అసలు విక్కీ రేసింగ్‌ను ఎందుకు వదిలేశాడు? ఈ కథలో అనన్య (మాళవిక నాయర్) పాత్ర ఏమిటి? తండ్రీకొడుకుల మధ్య ఉన్న సంఘర్షణ ఏమైంది? చివరికి విక్కీ మళ్లీ రేసింగ్ ట్రాక్‌పైకి ఎలా వచ్చాడు? అన్నదే ఈ చిత్ర ప్రధానాంశం.

ప్లస్ పాయింట్స్
తెలుగులో ఇప్పటివరకు రాని మోటోక్రాస్ రేసింగ్ క్రీడను నేపథ్యంగా ఎంచుకోవడం ఈ సినిమాకు అతిపెద్ద బలం. రేసింగ్ సన్నివేశాలను చిత్రీకరించిన తీరు ఉత్కంఠభరితంగా ఉంది. శర్వానంద్ తన పాత్రలో పరకాయ ప్రవేశం చేశారు. రేసర్‌గా ఫిజిక్ పరంగా, ఎమోషనల్ సీన్స్‌లో నటన పరంగా మెప్పించారు. ఇక ‘యాంగ్రీ మ్యాన్’ రాజశేఖర్ తన వయసుకి తగ్గ గౌరవప్రదమైన పాత్రలో అద్భుతంగా నటించారు. ఆయన కెరీర్‌లో ఇదొక గొప్ప క్యారెక్టర్ రోల్ అని చెప్పవచ్చు. రేసింగ్ సన్నివేశాల కొరియోగ్రఫీ, జె. యువరాజ్ సినిమాటోగ్రఫీ హైలైట్‌గా నిలిచాయి. గిబ్రాన్ నేపథ్య సంగీతం ఉత్కంఠను రెట్టింపు చేసింది.

మైనస్ పాయింట్స్
స్పోర్ట్స్ డ్రామాలో ఉండే పాత ఫార్ములా సన్నివేశాలు కొన్ని చోట్ల కనిపిస్తాయి. దీనివల్ల కొన్ని ఘట్టాలు ఊహకు అందేలా ఉంటాయి. సెకండ్ హాఫ్‌తో పోలిస్తే ఫస్ట్ హాఫ్ కాస్త నెమ్మదిగా సాగుతుంది. హీరో-హీరోయిన్ల మధ్య ఘర్షణ పాయింట్‌ను ఇంకాస్త బలంగా చూపించి ఉంటే బాగుండేది. హీరో లక్ష్యాలను చేరుకోవడం కొన్ని చోట్ల చాలా సులభంగా అనిపిస్తుంది, దీనివల్ల వాస్తవికత కొంచెం తగ్గినట్లు అనిపిస్తుంది.

సాంకేతిక విభాగం
దర్శకుడు అభిలాష్ రెడ్డి ఒక విభిన్నమైన క్రీడను ఎంచుకుని, దానికి భావోద్వేగాలను జోడించి మెప్పించడంలో సక్సెస్ అయ్యారు. నిర్మాణ విలువలు అత్యున్నత స్థాయిలో ఉన్నాయి. ఎడిటింగ్ రెండో సగంలో బాగున్నప్పటికీ, మొదటి సగంలో ఇంకాస్త పదును పెట్టాల్సింది.

తీర్పు
మొత్తంగా చెప్పాలంటే.. ‘బైకర్’ ఒక ఆసక్తికరమైన మరియు ఎమోషనల్ స్పోర్ట్స్ డ్రామా. శర్వానంద్, రాజశేఖర్‌ల అద్భుత నటన, అబ్బురపరిచే రేసింగ్ సీక్వెన్సులు ఈ సినిమాకు ప్రధాన ఆకర్షణ. మొదటి సగం నెమ్మదిగా ఉన్నప్పటికీ, స్పోర్ట్స్ సినిమాలు ఇష్టపడే వారికి ఇది ఒక మంచి అనుభూతిని ఇస్తుంది.

రేటింగ్: 3.25/5