Bigg Boss 10 | ఆరో వారంలో నామినేషన్ల మంటలు.. రోహిత్ వర్సెస్ వంశీ, అమన్ వర్సెస్ ముకేశ్!

Bigg Boss 10 | బిగ్‌బాస్ తెలుగు సీజన్ 10లో ఆరో వారం నామినేషన్ల ప్రక్రియ హాట్‌హాట్‌గా సాగింది. సోమవారం జరిగిన నామినేషన్లలో కంటెస్టెంట్ల మధ్య మాటల యుద్ధాలు, వ్యక్తిగత విమర్శలు హౌస్‌లో వేడిని పెంచాయి. ఈసారి నామినేషన్ల బాధ్యతను కొత్తగా హౌస్‌లోకి వచ్చిన వైల్డ్ కార్డ్ కంటెస్టెంట్లకు అప్పగించడంతో ప్రక్రియ మరింత ఆసక్తికరంగా మారింది.

Bigg Boss 10 | బిగ్‌బాస్ తెలుగు సీజన్ 10లో ఆరో వారం నామినేషన్ల ప్రక్రియ హాట్‌హాట్‌గా సాగింది. సోమవారం జరిగిన నామినేషన్లలో కంటెస్టెంట్ల మధ్య మాటల యుద్ధాలు, వ్యక్తిగత విమర్శలు హౌస్‌లో వేడిని పెంచాయి. ఈసారి నామినేషన్ల బాధ్యతను కొత్తగా హౌస్‌లోకి వచ్చిన వైల్డ్ కార్డ్ కంటెస్టెంట్లకు అప్పగించడంతో ప్రక్రియ మరింత ఆసక్తికరంగా మారింది. రోహిత్, వంశీ మధ్య వాగ్వాదం, ముకేశ్–అమన్‌ల మధ్య ఘర్షణ, షాలిని–దేబ్జానీ మధ్య తీవ్ర చర్చ ప్రేక్షకుల దృష్టిని ఆకర్షించాయి. ఆరో వారం నామినేషన్లలో బిగ్‌బాస్ కొత్త విధానాన్ని ప్రవేశపెట్టారు. ప్రతి రౌండ్ ప్రారంభానికి ముందు సైరన్ మోగుతుంది. అప్పుడు వైల్డ్ కార్డ్ కంటెస్టెంట్లలో ఒకరు ఇద్దరు పాత కంటెస్టెంట్లను ఎంపిక చేయాలి. ఆ ఇద్దరూ ఒక టాస్క్‌లో పోటీపడతారు. విజేతకు ఇద్దరు హౌస్‌మేట్స్‌ను నామినేట్ చేసే అవకాశం లభిస్తుంది.

విజేత చెప్పిన కారణాలతో పాటు నామినేట్ అయిన ఇద్దరి వాదనలను కూడా వైల్డ్ కార్డ్ కంటెస్టెంట్లు వింటారు. అనంతరం ఆ ఇద్దరిలో ఒకరి నామినేషన్‌ను మాత్రమే ఆమోదిస్తారు. దీంతో ఎవరిని నామినేట్ చేయాలనే విషయంలో కంటెస్టెంట్ల మధ్య వాదనలు మరింత తీవ్రంగా సాగాయి. మొదటి రౌండ్‌లో శివ.. త్రిగుణ్, రోహిత్‌లను ఎంపిక చేశాడు. వీరిద్దరూ టాస్క్‌లో పోటీపడగా రోహిత్ విజయం సాధించాడు. అనంతరం తన నామినేషన్లలో భాగంగా వంశీని, ఝాన్సీని ఎంపిక చేశాడు. వంశీని నామినేట్ చేస్తూ రోహిత్ మర్యాద గురించి ప్రస్తావించాడు. ఇతరులకు మర్యాద ఇవ్వాలని చెప్పే ముందు, ఆ విషయాన్ని తాను కూడా పాటించాలని వంశీకి సూచించాడు. దీంతో ఇద్దరి మధ్య మాటల యుద్ధం మొదలైంది.

మరోవైపు ఝాన్సీని నామినేట్ చేస్తూ రోహిత్.. ప్రజలపై నమ్మకం ఉందని చెబుతూనే ఎవిక్షన్ ప్రీ పాస్‌ను తనకు అనుకూలంగా, స్వార్థం కోసం ఉపయోగించడం సరైనది కాదని వాదించాడు. ఇద్దరి వాదనలు విన్న శివ.. వంశీ నామినేషన్‌ను ఆమోదించాడు. దీంతో మొదటి రౌండ్‌లోనే హౌస్‌లో వేడి పెరిగింది. రెండో రౌండ్‌లో శ్వేతా నాయుడు.. ముకేశ్, అమన్‌లను ఎంపిక చేసింది. టాస్క్‌లో ముకేశ్ విజయం సాధించాడు. అనంతరం అమన్‌ను నామినేట్ చేస్తూ అతడు మళ్లీ అసభ్య పదజాలం ఉపయోగిస్తున్నాడని ఆరోపించాడు. ఈ విషయంపై ఇద్దరి మధ్య తీవ్ర వాగ్వాదం జరిగింది. మధ్యలో త్రిగుణ్ జోక్యం చేసుకోవడంతో వివాదం మరింత ముదిరింది. ఒకరినొకరు ఉద్దేశించి ఇద్దరూ ఘాటైన పదాలు ఉపయోగించడంతో మిగతా కంటెస్టెంట్లు జోక్యం చేసుకుని వారిని శాంతింపజేసే ప్రయత్నం చేశారు.

ఆ తర్వాత షాలినిని నామినేట్ చేసిన ముకేశ్.. ఆమె ప్రయత్నిస్తున్నప్పటికీ ఆటలో మరింత చురుగ్గా పాల్గొనాలని సూచించాడు. ఇద్దరి వాదనలు విన్న శ్వేతా నాయుడు.. అమన్ నామినేషన్‌ను ఆమోదించింది. మూడో రౌండ్‌లో నీతూ నటరాజ్.. షాలిని, వర్షిణిలను ఎంపిక చేసింది. టాస్క్‌లో షాలిని విజయం సాధించింది. అనంతరం దేబ్జానీని నామినేట్ చేస్తూ ఆమె భాషా సమస్యను ప్రస్తావించింది. భాషా పరిమితులు ఉన్నాయని అర్థం చేసుకున్నప్పటికీ, తన అభిప్రాయం ప్రకారం దేబ్జానీ స్వార్థపూరితంగా ఆడుతోందని షాలిని ఆరోపించింది. అంతేకాకుండా, తనను తక్కువ చేసి మాట్లాడటం వల్ల మానసికంగా బాధపడ్డానని పేర్కొంది. దీంతో ఇద్దరి మధ్య వాదన మొదలైంది.

షాలిని చేసిన ఆరోపణలకు దేబ్జానీ ఎలా స్పందించిందన్నది ఆసక్తికరంగా మారింది. వీరిద్దరి మధ్య చర్చ కొనసాగుతున్న సమయంలోనే ఎపిసోడ్ ముగిసింది. దీంతో నామినేషన్ల ప్రక్రియలో తదుపరి పరిణామాలపై ప్రేక్షకుల్లో ఉత్కంఠ నెలకొంది. ఈ వారం నామినేషన్లలో కంటెస్టెంట్లు తమ ఆటతీరుతో పాటు ఇతరుల ప్రవర్తన, మాటతీరు, వ్యక్తిగత నిర్ణయాలను కూడా ప్రశ్నించారు. రోహిత్–వంశీ మధ్య మర్యాదపై వివాదం, ముకేశ్–అమన్ మధ్య అసభ్య పదజాలంపై గొడవ, షాలిని–దేబ్జానీ మధ్య భాషా సమస్యపై వాగ్వాదం ఎపిసోడ్‌కు ప్రధాన ఆకర్షణగా నిలిచాయి.

కొత్త నామినేషన్ విధానంలో వైల్డ్ కార్డ్ కంటెస్టెంట్లు కీలక పాత్ర పోషిస్తుండటంతో ఈ వారం ఎవరు ప్రమాదంలో పడతారనే ఆసక్తి పెరిగింది. అయితే నామినేషన్ల ప్రక్రియ ఇంకా కొనసాగాల్సి ఉండటంతో తుది జాబితాపై స్పష్టత రావాల్సి ఉంది. రాబోయే ఎపిసోడ్లలో మరెన్ని గొడవలు చోటుచేసుకుంటాయో, ఎవరెవరు ఎలిమినేషన్ ముప్పును ఎదుర్కొంటారో చూడాలి.