Visit:
Bigg Boss 10 | తెలుగు బుల్లితెరపై అత్యంత ప్రజాదరణ పొందిన రియాలిటీ షోల్లో ఒకటైన ‘బిగ్ బాస్ తెలుగు’ మరో కొత్త సీజన్తో ప్రేక్షకుల ముందుకు రాబోతోంది. ఇప్పటికే తొమ్మిది విజయవంతమైన సీజన్లను పూర్తి చేసుకున్న ఈ షో, ప్రతి ఏడాది కొత్త కాన్సెప్ట్లు, ఊహించని ట్విస్టులతో ప్రేక్షకులను ఆకట్టుకుంటూ వస్తోంది. ఇప్పుడు ‘బిగ్ బాస్ తెలుగు సీజన్-10’ కోసం ఏర్పాట్లు ప్రారంభం కావడంతో అభిమానుల్లో భారీ ఆసక్తి నెలకొంది. ఈ కొత్త సీజన్కు కూడా కింగ్ అక్కినేని నాగార్జున హోస్ట్గా వ్యవహరించనున్నట్లు ఇటీవల విడుదలైన అధికారిక ప్రోమో ద్వారా స్పష్టమైంది. నాగార్జున మరోసారి తన ప్రత్యేక శైలిలో ప్రేక్షకులను అలరించేందుకు సిద్ధమవుతుండటంతో షోపై అంచనాలు మరింత పెరిగాయి.
గత సీజన్లో నిర్వాహకులు ప్రవేశపెట్టిన ‘అగ్నిపరీక్ష’ కాన్సెప్ట్కు ప్రేక్షకుల నుంచి అద్భుతమైన స్పందన లభించింది. సెలబ్రిటీలతో పాటు సామాన్య ప్రజలకు కూడా బిగ్ బాస్ హౌస్లో అడుగుపెట్టే అవకాశం కల్పించడం విశేషంగా నిలిచింది. ఈ కాన్సెప్ట్ ద్వారా పలువురు కొత్త ముఖాలు ప్రేక్షకులకు పరిచయమయ్యాయి. ఆ విజయాన్ని దృష్టిలో పెట్టుకుని ఇప్పుడు ‘అగ్నిపరీక్ష సీజన్-2’ను ప్రారంభిస్తున్నట్లు నిర్వాహకులు అధికారికంగా ప్రకటించారు. ఇందుకు సంబంధించిన ప్రత్యేక ప్రోమోను విడుదల చేస్తూ, తమలోని ప్రతిభను ప్రపంచానికి చూపించాలనుకునే వారికి మరోసారి అవకాశాన్ని కల్పిస్తున్నట్లు వెల్లడించారు.
బిగ్ బాస్ హౌస్లోకి వెళ్లాలనే కల కలిగిన సాధారణ అభ్యర్థులు ఈ అగ్నిపరీక్షలో పాల్గొనవచ్చు. తమ వ్యక్తిత్వం, ప్రతిభ, ప్రత్యేకతలను చూపించే విధంగా ఒక ఆడిషన్ వీడియోను రూపొందించి పంపించాల్సి ఉంటుంది. వీడియోలో తమ గురించి, ఎందుకు బిగ్ బాస్లో పాల్గొనాలనుకుంటున్నారో వివరించాల్సి ఉంటుంది.నిర్వాహకులు విడుదల చేసిన వివరాల ప్రకారం, జూన్ 12 నుంచి జూన్ 20 వరకు ఈ ఆడిషన్ ప్రక్రియ కొనసాగనుంది. ఈ గడువులోపు ఆసక్తి ఉన్న అభ్యర్థులు తమ వీడియోలను సమర్పించాల్సి ఉంటుంది.ప్రతి సీజన్లో కొత్త టాస్కులు, కొత్త వివాదాలు, భావోద్వేగ క్షణాలు, ఊహించని ఎలిమినేషన్లు ప్రేక్షకులను ఆకట్టుకుంటుంటాయి. దీంతో పదో సీజన్లో నిర్వాహకులు ఎలాంటి కొత్త కాన్సెప్ట్లతో ముందుకు వస్తారో అనే ఆసక్తి అభిమానుల్లో నెలకొంది.
