A.R Murugadoss-Vikram Movie | విభిన్న పాత్రలను ఎంచుకుంటూ విలక్షణ నటనతో ప్రేక్షకులను విపరీతంగా ఆకట్టుకునే నటుడు విక్రమ్. పేరుకు అరవ హీరోనే అయినా తెలుగులో మంచి క్రేజ్ను సంపాదించుకున్నాడు. ప్రతి సినిమాకు విభిన్న వేరియేషన్లను చూపిస్తూ విలక్షణ నటుడిగా పేరుతెచ్చుకున్నాడు. గత కొంత కాలంగా సరైన హిట్టులేని విక్రమ్కు ‘మహాన్’ మంచి కంబ్యాక్ ఇచ్చింది. అమేజాన్ ప్రైమ్లో నేరుగా విడుదలైన ఈ చిత్రం మంచి వ్యూవర్ షిప్ను సొంతం చేసుకుంది. ఈ చిత్రంలో విక్రమ్ తనయుడు ధృవ్ కీలకపాత్రలో నటించాడు. ఇదిలా ఉంటే తాజాగా ఈయన స్టార్ దర్శకుడితో సినిమాకు సైన్ చేసినట్లు తెలుస్తుంది.
సందేశాత్మక సినిమాలకు కమర్షియల్ అంశాలను జోడించి మంచి విజయాలను సాధిస్తుంటాడు ఏఆర్.మురుగుదాస్. ఇప్పుడంటే ఈయన సినిమాలు ఉప్పులేని పప్పు చారులా ఉన్నాయి గాని, అప్పట్లో ఈయన సినిమాలు హైదరాబాద్ దమ్ బిర్యాని కంటే స్పైసీగా ఉండేవి. కేవలం పోస్టర్పైన ఈయన పేరు ఉంటే చాలు చాలా మంది సినీఅభిమానులు థియేటర్లకు పరుగులు తీసేవారు. అయితే తాజాగా ఈయన విక్రమ్కు ఓ కథ వినిపించాడట. విక్రమ్కు కథ నచ్చడంతో వెంటనే గ్రీన్ సిగ్నల్ ఇచ్చాడట. ఇక ఈ చిత్రాన్ని సన్ పిక్చర్స్ పతాకంపై కళానిధి మారన్ నిర్మించనున్నట్లు టాక్. ప్రస్తుతం ఏఆర్ మురుగుదాస్ స్క్రిప్ట్ను పూర్తి చేసే పనిలో ఉన్నాడట. త్వరలోనే ఈ ప్రాజెక్ట్కు సంబంధించిన విషయాలు వెల్లడయ్యే అవకాశం ఉంది.
విక్రమ్ చేతిలో ప్రస్తుతం నాలుగు సినిమాలున్నాయి. అందులో ‘కోబ్రా’ షూటింగ్ పూర్తి చేసుకుని ప్రస్తుతం ప్రీ ప్రొడక్షన్ పనులలో బిజీగా ఉంది. మే 25న ఈ చిత్రం విడుదల కానున్నట్లు మేకర్స్ ఇదివరకే ప్రకటించారు. మణిరత్నం దర్శకత్వంలో తెరకెక్కిన ‘పొన్నియన్ సెల్వన్’ సెప్టెంబర్ 30న విడుదల కానుంది. వీటితో పాటుగా ‘ధృవ్ నచ్చితరమ్’ గతంలోనే షూటింగ్ పూర్తి చేసుకుంది. కానీ ఇంకా విడుదలకు నోచుకోలేదు. ఇక పా. రంజిత్ దర్శకత్వంలో ఓ సినిమాను చేయనున్నాడు. ప్రస్తుతం ఈ చిత్రం ప్రీ ప్రొడక్షన్ పనులను జరుపుకుంటుంది.