ఉత్కంఠభరితంగా ‘హైవే’

ఆనంద్‌ దేవరకొండ కథానాయకుడిగా నటిస్తున్న చిత్రం ‘హైవే’. మానస రాధాకృష్ణన్‌ కథానాయిక. కేవీ గుహన్‌ దర్శకత్వంలో వెంకట్‌ తలారి ఈ చిత్రాన్ని నిర్మిస్తున్నాడు. ఇటీవల ఈ చిత్రంలో నటిస్తున్న నటీనటుల కాన్సెప్ట్‌ పోస్టర్స్‌ను విడుదల చేశారు. దర్శకుడు చిత్ర విశేషాలు తెలియజేస్తూ ‘ ఈ చిత్రంలో ఆనంద్‌ దేవరకొండ సరికొత్త లుక్‌లో కనిపించబోతున్నాడు. సైకో క్రైమ్‌ థ్రిల్లర్‌గా రూపొందుతున్న ఈ చిత్రంలో ప్రతి పాత్ర ఎంతో ఆసక్తికరంగా వుంటుంది. బాలీవుడ్‌ నటులు అభిషేక్‌ బెనర్జీ, సయామీ ఖేర్‌ కీలకపాత్రల్లో నటిస్తున్నారు. ఒకరితో ఒకరికి సంబంధం లేని నలుగురు వ్యక్తుల కథ. పూర్తిగా హైవే నేపథ్యంలో సాగే సీట్‌ ఎడ్జ్‌ థ్రిల్లర్‌’ అన్నారు. నిర్మాణానంతర పనులు తుదిదశకు చేరుకున్నాయని, ఎక్కడా రాజీపడకుండా చిత్రాన్ని అత్యధిక వ్యయంతో తెరకెక్కిస్తున్నామని నిర్మాత తెలిపారు. ఈ చిత్రానికి సంగీతం: సైమన్‌.కె.కింగ్‌.