Visit:
Akhil | అక్కినేని యువ హీరో అఖిల్ అక్కినేని ఎట్టకేలకు తన కెరీర్లో కీలక విజయాన్ని అందుకున్నారు. ఇటీవల వచ్చిన గ్రామీణ నేపథ్య యాక్షన్ డ్రామా ‘లెనిన్’ తో అఖిల్ బాక్సాఫీస్ వద్ద మంచి విజయాన్ని సొంతం చేసుకున్నారు. ఇప్పటివరకు ఆయన కెరీర్లో వచ్చిన సినిమాల్లో ఇదే తొలి భారీ కమర్షియల్ హిట్గా నిలవడంతో అక్కినేని అభిమానుల్లో కొత్త ఉత్సాహం నెలకొంది. చాలా కాలంగా అఖిల్కు సరైన విజయం కోసం ఎదురుచూస్తున్న అభిమానులకు ‘లెనిన్’ విజయం భారీ రిలీఫ్ ఇచ్చింది. ఈ సినిమా సక్సెస్తో అఖిల్ తదుపరి ప్రాజెక్ట్పై సహజంగానే ఆసక్తి పెరిగింది. అయితే ప్రస్తుతం సోషల్ మీడియాలో అఖిల్ నెక్ట్స్ మూవీకి సంబంధించి పలు రకాల వార్తలు, రూమర్స్ వైరల్ అవుతున్నాయి.
అఖిల్ తదుపరి సినిమాకు సంబంధించి కొన్ని ప్రాజెక్టులు ఫైనల్ అయ్యాయని, పలువురు దర్శకులతో ఆయన చర్చలు జరుపుతున్నారని సోషల్ మీడియాలో ప్రచారం జరుగుతోంది. అయితే ఈ వార్తల్లో ఏమాత్రం నిజం లేదని అఖిల్ టీమ్ స్పష్టం చేసింది. ఈ మేరకు అఖిల్ అక్కినేని టీమ్ అధికారికంగా ఓ ప్రకటన విడుదల చేసింది. అఖిల్ తన తదుపరి సినిమాను ఇంకా ఏదీ సైన్ చేయలేదని స్పష్టం చేసింది. ప్రస్తుతం సోషల్ మీడియాలో ప్రచారం అవుతున్న ఎలాంటి వార్తలను నమ్మవద్దని, వాటిని మరింతగా ప్రచారం చేయవద్దని అభిమానులు, మీడియాను కోరింది. అఖిల్ తదుపరి ప్రాజెక్ట్కు సంబంధించిన అధికారిక ప్రకటనను త్వరలోనే వెల్లడిస్తామని ఆయన టీమ్ తెలిపింది. దీంతో ప్రస్తుతం అఖిల్ నెక్ట్స్ మూవీపై వస్తున్న వార్తలన్నీ కేవలం ఊహాగానాలేనని స్పష్టమైంది.
‘లెనిన్’ వంటి భారీ విజయం తర్వాత అఖిల్ తన తదుపరి సినిమాను చాలా జాగ్రత్తగా ఎంపిక చేసుకునే అవకాశం ఉందని అభిమానులు భావిస్తున్నారు. ముఖ్యంగా తన కెరీర్కు మంచి టర్నింగ్ పాయింట్ ఇచ్చిన ‘లెనిన్’ తర్వాత వచ్చే సినిమా కూడా అదే స్థాయిలో ఉండాలని అక్కినేని ఫ్యాన్స్ కోరుకుంటున్నారు. అఖిల్ కెరీర్లో ఇప్పటివరకు పలు విభిన్నమైన కథలను ప్రయత్నించినప్పటికీ.. ఆశించిన స్థాయిలో భారీ కమర్షియల్ విజయాన్ని అందుకోలేకపోయారు. ఈ నేపథ్యంలో ‘లెనిన్’ విజయం ఆయనకు ఎంతో కీలకంగా మారింది. గ్రామీణ నేపథ్యం, యాక్షన్ అంశాలతో తెరకెక్కిన ఈ సినిమాలో అఖిల్ తన నటనతో ప్రేక్షకులను ఆకట్టుకున్నారు. సినిమా విజయంతో అఖిల్ మార్కెట్పై కూడా పాజిటివ్ బజ్ ఏర్పడింది. ఈ జోష్లోనే ఆయన తదుపరి సినిమాపై అక్కినేని అభిమానులు ఆసక్తిగా ఎదురుచూస్తున్నారు. ప్రస్తుతం మాత్రం అఖిల్ తన నెక్ట్స్ ప్రాజెక్ట్ను ఇంకా ఫైనల్ చేయలేదు. దర్శకుడు, కథ, నిర్మాణ సంస్థ తదితర వివరాలపై ఎలాంటి అధికారిక సమాచారం లేదు. త్వరలోనే అఖిల్ తదుపరి సినిమాకు సంబంధించిన అధికారిక ప్రకటన వస్తుందని టీమ్ స్పష్టం చేయడంతో.. అభిమానుల చూపులన్నీ ఆ అనౌన్స్మెంట్పైనే ఉన్నాయి.
