Thunivu Movie | సంక్రాంతి పండగ అంటేనే సినిమాల సందడి. ఈ పండగను టాలీవుడ్ ఇండస్ట్రీ వారు సినిమా పండగలా భావిస్తుంటారు. అంతేకాకుండా తెలుగు సినిమాలకు సంక్రాంతి అనేది పెద్ద సీజన్. అందుకే సంక్రాంతి కోసం పెద్ద పెద్ద హీరోలు పోటీ పడుతుంటారు. మరీ ముఖ్యంగా కొన్ని సినిమాలు సంక్రాంతిని టార్గెట్ చేసుకుని రూపొందుతుంటాయి. సంక్రాంతికి రెండు, మూడు సినిమాలు రిలీజైన అవి బాక్సాఫీస్ దగ్గర బ్రేక్ ఈవెన్ అయ్యే చాన్స్ ఎక్కువగా ఉంటుంది. ఇక టాలీవుడ్ సినిమాలతో పాటు అనువాద చిత్రాలు కూడా చుట్టం చూపుగా ప్రతీ సంక్రాంతికి వస్తుంటాయి.
ఇప్పటికే ‘వీరసింహా రెడ్డి’, ‘వాల్తేరు వీరయ్య’, ‘వారసుడు’ సినిమాలు సంక్రాంతికి టిక్కెట్లు బుక్ చేసుకున్నాయి. కాగా తాజాగా మరో సినిమాకు సంక్రాంతి టిక్కెట్ కన్ఫార్మ్ అయినట్లు తెలుస్తుంది. ఇన్నాళ్లు వేయిటింగ్ లిస్ట్లో ఉన్న అజిత్ ‘తునివు’ సినిమాకు తాజాగా టిక్కెట్ ఓకే అయినట్లు తెలుస్తుంది. ఈ చిత్రాన్ని ‘తెగింపు’ పేరుతో రాధాకృష్ణ ఎంటర్టైనమెంట్స్ నిర్వాహకులు తెలుగులో రిలీజ్ చేస్తున్నారు. ఇక ఇప్పటికే సంక్రాంతి సీజన్ను బుక్ చేసుకున్న మూడు సినిమాలు థియేటర్ల దొరక్క ఇబ్బంది పడుతుంటే, ఇక ఇప్పుడు ఈ సినిమా కూడా చేరడంతో థియేరట్లలో సందిగ్ధత నెలకొంది.
దిల్రాజు నిర్మించిన ‘వారసుడు’ సినిమా సంక్రాంతికి పెద్ద ఎత్తున రిలీజ్ కాబోతుంది. ఇప్పటికే అయన తన సర్కిల్లో ఉన్న థియేటర్లను బుక్ చేసుకున్నాడు. ఇక ‘వీర సింహా రెడ్డి’, ‘వాల్తేరు వీరయ్య’ సినిమాలు మిగిలిన థియేటర్లు పంచుకోనున్నాయి. ఇక ఇప్పుడు ‘తునివు’ కూడా రావడంతో థియేటర్ల సమస్య ఏర్పడింది. అయితే ఈ సినిమాకు వంద వరకు మాత్రమే థియేటర్లకు దక్కనున్నట్లు తెలుస్తుంది. ముఖ్యంగా సిటీలలోనే ఈ సినిమా ఎక్కువగా ప్రదర్శితం కానుందట. తెలుగు రాష్ట్రాల్లో ఈ సినిమాకు మూడు కోట్లు థియేట్రికల్ బిజినెస్ జరిగిందని సమాచారం. కాగా ఈ సినిమాపై ఇప్పటివరకు ఎలాంటి బజ్ లేదు. అసలు ఈ సినిమా ఉందన్న విషయమే తెలుగు ప్రేక్షకుల్లో చాలా మందికి తెలియదు. ఇలాంటి టైమ్లో ఈ మూవీని రిలీజ్ చేస్తున్నారంటే రిస్క్ అనే చెప్పాలి. మరీ ఆ మూడు సినిమాల పోటీను తట్టుకుని తునివు నిలుస్తుందా లేదా అనేది చూడాలి.