Adah Sharma | ఫిల్మ్ బ్యాక్‌గ్రౌండ్ ఉంటే.. హారర్ సినిమా చేసేదాన్ని కాదు.. నెపోటిజంపై అదా శర్మ కామెంట్స్

Adah Sharma | బాలీవుడ్‌లో బంధుప్రీతి (నెపోటిజం)పై తరచుగా చ‌ర్చ‌లు జ‌రుగుతాయ‌న్న విష‌యం తెలిసిందే. ఈ విషయంపై నటి అదా శర్మ తనదైన శైలిలో ఆసక్తికర వ్యాఖ్యలు చేశారు.

Adah Sharma | బాలీవుడ్‌లో బంధుప్రీతి (నెపోటిజం)పై తరచుగా చ‌ర్చ‌లు జ‌రుగుతాయ‌న్న విష‌యం తెలిసిందే. ఈ విషయంపై నటి అదా శర్మ తనదైన శైలిలో ఆసక్తికర వ్యాఖ్యలు చేశారు. తాను సినిమా కుటుంబం నుండి వచ్చి ఉంటే.. తనను హారర్ సినిమాతో పరిచయం చేసేవారు కాదని ఆమె పేర్కొన్నారు.

అదా శర్మ తన కెరీర్‌ను 2008లో విడుదలైన హారర్ సినిమా ‘1920’ తో ప్రారంభించారు. ఈ సినిమా బాక్స్ ఆఫీస్ వద్ద విజయం సాధించినప్పటికీ, ఒక నటిగా మంచి గుర్తింపు ల‌భించ‌లేదు. దీనిపై అదా శర్మ మాట్లాడుతూ, “నేను సినిమా కుటుంబం నుండి వచ్చి ఉంటే, నన్ను పరిచయం చేయడానికి ఒక పర్ఫెక్ట్ రొమాంటిక్ సినిమా కోసం వేచి ఉండేవారు. నా కుటుంబం నన్ను హారర్ సినిమా చేయనిచ్చేది కాదు. ఎవరు తమ కెరీర్‌ను దెయ్యం పట్టినట్లు, నల్లటి పళ్లతో తెరపై కనిపిస్తూ ప్రారంభిస్తారు? ప్రముఖుల కుటుంబం నుండి వచ్చి ఉంటే, ఒక సాధారణ రొమాంటిక్ సినిమాతో నా కెరీర్ ప్రారంభమయ్యే అవకాశం ఉండేది. నేను ‘1920’ తో ప్రారంభించాను, అందుకు నేను అదృష్టవంతురాలిని. నేను ఏదైనా కొత్తగా ప్రయత్నించినప్పుడల్లా ప్రేక్షకులు నన్ను అంగీకరించారు, బహుశా అందుకే సినీ నిర్మాతలు కూడా నన్ను విభిన్న పాత్రలలో నటించడానికి ధైర్యం చేస్తున్నారు” అని అన్నారు.

అదా శర్మ ‘కమాండో’ ఫ్రాంచైజీలో యాక్షన్ పాత్రలతో ఆకట్టుకోవడమే కాకుండా, ‘ది కేరళ స్టోరీ’ చిత్రంలో కూడా నటించి విమర్శకుల ప్రశంసలు అందుకున్నారు. ఈ విషయంపై అదా శర్మ మాట్లాడుతూ, ‘ది కేరళ స్టోరీ’ చూసినప్పుడు, ‘ఓహ్, ఆమె యాక్షన్ చేయగలదు, ఆమె ఎందుకు టెర్రరిస్ట్‌ల‌ను కొట్టడం లేదు?’ అని ప్రజలు అనలేదు. ‘సన్‌ఫ్లవర్ సీజన్ 2’ లో బార్ డ్యాన్సర్ రోసీగా, ‘బస్తర్: ది నక్సల్ స్టోరీ’ లో ఐపీఎస్ అధికారిగా కూడా ప్రజలు నన్ను మెచ్చుకున్నారు. నా కెరీర్ ఈ విధంగా విభిన్నంగా సాగినందుకు నేను చాలా అదృష్టవంతురాలిని” అని తెలిపారు. అదా శర్మ తన కెరీర్‌లో విభిన్నమైన, సవాలుతో కూడిన పాత్రలను ఎంచుకుంటూ ప్రేక్షకులను అలరిస్తున్నారు. ప్రస్తుతం అదా శర్మ తన రాబోయే ప్రాజెక్ట్‌లో ఒక దేవత పాత్రలో కనిపించనున్నారు.