ముంబై : బాలీవుడ్ కండలవీరుడు సల్మాన్ ఖాన్ తర్వాత నటి స్వర భాస్కర్కు బెదిరింపు లేఖ వచ్చింది. స్వర భాస్కర్ను చంపేస్తామని అజ్ఞాత వ్యక్తి నుంచి ఆమె నివాసానికి స్పీడ్ పోస్ట్ ద్వారా లేఖ అందింది. ముంబైలోని వెర్సోవాలో నటి నివాసానికి ఈ లేఖను పంపారు. స్వర భాస్కర్కు బెదిరింపు లేఖ రావడంపై ముంబై పోలీసులు దర్యాప్తు చేపట్టారు.
తన నివాసానికి బెదిరింపు లేఖ రావడంతో నటి స్వర భాస్కర్ వెర్సోవా పోలీస్ స్టేషన్లో గుర్తుతెలియని వ్యక్తులపై బుధవారం ఫిర్యాదు చేశారు. నటి ఫిర్యాదుపై కేసు నమోదు చేసి దర్యాప్తు చేపట్టామని పోలీసులు తెలిపారు. హిందీలో రాసిన ఈ లేఖలో స్వర భాస్కర్కు ప్రాణ హాని తలపెడతామని అంటూ అసభ్య పదజాలంతో దూషించారని చెప్పారు. లేఖ చివరిలో ఇట్లు ఈ దేశ యువకులు అని రాసి ఉందని తెలిపారు.
వీర్ సావర్కర్ను అవమానిస్తే దేశ యువత చూస్తూ ఊరుకోదని లేఖలో హెచ్చరించారు. సమాజంలో జరిగే సామాజిక రాజకీయాంశాలపై స్వర భాస్కర్ చురుకుగా స్పందిస్తుంటారు. జైలు నుంచి విడిచిపెట్టాలని వేడుకుంటూ సావర్కర్ బ్రిటిష్ ప్రభుత్వానికి క్షమాపణలు చెప్పారని ఆయన వీరుడు ఎంతమాత్రం కాదని 2017లో స్వర భాస్కర్ చేసిన ట్వీట్ దుమారం రేపింది